Beesten-godenzonen-zoepnaze combi wint euvertugend!

Ut woar klote waer de aafgeloupe waek en dus woort d’r links en rechs veul voetballe aafgelasj. Aangezeen veer in Sjtein euver un prima kunstgraasveldj besjikke, en Jan de Weijer de ganse waek op de middensjtip haet gekampeerd om te veurkomme dat de doelpoale waere doorgezaeg, koosjte toch veier seniorenteams in actie komme. Op zoaterdigoavend woorte de veteranen van ut veldj gebloaze door de vets van Urmond (2-6). En op zondig woare d’r auch treurende en gefrustreerde köpkes bie os eesjte en tweede elftal. Want beide teams sjpeelden mit 1-1 geliek taege unne vaol zjwakere taegesjtenjer (respectievelijk SSS’18 en MMC Weert 3). Gelukkig woar d’r toch nog eine driepunter te noteren op os Hetjen. Ut veerde moosj namelijk thoes aantraeje taege Born en boog unne 0-2 achtersjtandj om in un 5-2 euverwinning, mit behulp van un groot aantal huurlingen van ut driede. Klasse teamwork doa!