Wedstrijdverslagen

Veur de tweede waek op riej behoalden ozze seniorenteams prima resultaten. Die goei reeks woort op zoaterdigmiddig al ingezat door de veteranen, die de veteranen van Susteren soeverein klopten. Op zondig woare d’r zelfs veier euverwinninge: De Beesten van 5 klopten mede-middenmotor Gelaen Zuid 6 in unne sjpannende sjtried. De Zoepnaze van 4 sjpeelden onger leiding van sjeidsrechter Piet Claessens en dat bliek dit sezoen ’n garantie veur 3 punte (in taegesjtelling tot de wedsjtrieje onger leiding van Tom de Keul). De Ladies sjpeelden oet taege OVCS, wonnen die partie en deige ‘en passant’ de rooie lantaern euver aan die ploug.

In de tusjetied woare d’r helaas auch nederlagen te noteren veur os driede en tweede. De Godenzonen van 3 moosjten hunne meerdere erkennen in SVM 2 dat, tot grote tevrejenheid van kantinebaas Jo van Funs, kampioen woort op ’t Hetjen gistere. En os beloftenteam vonj gistere in Deurne heur Waterloo in de reserve hoofdklasse en moag kommend sezoen waer lekker in de 1e klasse goan ballen. Tot sjlot sjting op zondigmiddig in Genhout unne derby op ’t programma veur ozze hoofdmacht. Unne derby dae euvertugend woort gewonne door de mannen van coach Czornyj.

Mannen van ut weekend? Dat woare d’r drie. Te beginne mit de nog B-gerechtigde Sjoerd van Mulken dae veur de tweede waek op riej in de basis sjtartte bie De Sjter 1 en unne prima pot sjpeelde. Maar auch De Sjter 5-vedette Bob Schoutrop verdeint ’n eervolle vermelding vanwaege zien doelpunten veur zowel De Sjter 5 es De Sjter 4 dit weekend. Mit die treffers haet Bob de gouwe sjoon-trofee zo goud es binne. En tot sjlot moag auch veteraan Ron Marchal neit onvermeld blieve. Zonger zien vaste maatje op rechs, Willem Thewissen, sjpeelde Ron neit allein ’n puike partie, maar woar hae auch waer goud veur de neudige “vief-sjterre-quotes”. Get wo euver Ron zelf, noa de zoveulste geweldige opmerking, auch nog get te melden houw:

Ron: “Kense in die sjtukskes neit ens unne angere naam dan dae van mich d’r bie sjrieve?”

Eddy: “Doe kens auch ens geweun zelf de moel toe haute.”

Ron: “Joa, maar dat bedenk ich mich ummer sjus te laat.“

Loate veer ut weekend maar ens goan doornumme. Te beginne mit de door De Sjter 3-coach Mark Habets en De Sjter 3-vlaggenist en veteranen-sjpeler Paul Janssen georganiseerde poker oavend in de kantine. Dit joarlijks terugkkerend evenement is inmiddels oetgegruijd tot ’n begrip in de wieje omgaeving en trek zelfs poker-sjpelers van boetenaaf aan. Organisator Mark Habets kreeg zelfs telefoontjes van luuj die wolle komme pokere. En dat ging ongeveer zo:

Poker-wannabe: “Hoe laat begint dat toernooi?”

Mark: “Oh, veer kieke waal. Es ut tweede kloar is mit traine.”

Poker-wannabe: “Tweede?”

Mark: “Joa, en es nog un paar man van 1 wulle mitdoon, wachte veer doa auch nog op.”

Poker-wannabe: “Oh, nou ja, en wat is het prijzengeld?”

Mark: “Dat weit ich neit, man. Doa geit ut neit om. Dat bekieke veer waal aan ’t eind van de oavend.”

Poker-wannabe: “En tot hoe laat duurt het?”

Mark: “Totdat Jo van Funs os d’r oet zet.”

In totaal 26 sjpelers nome ’t, verdeild euver drie toafels, taege elkaar op. De sjpanning droop, vlak veur ’t begin, van de gezichte aaf. Behalve bie de permanent-relaxte Youri Voesten. Al koosj dat auch get te make hubbe mit zien buurvrouw aan toafel:

foto1

Door ’t ontbraeke van oud-winnaar Patrick Nordhausen, dae Sef Geuskens en Rudy Crutzen get gezelsjap heel aan de teek, loog ’t toernooi gans oape. Titelverdediger Charaff Khaddouri en oud-winnaar Rob Schulpen sjtelden teleur mit vruige exits. Luc Spaans verbaasde mit unne vleigende sjtart maar ging, noa 5 baco’s, get te voal in zichzelf geluive en moosj auch aafdruipen. Veteraan Robert Lucassen profiteerde lang van de dodelijke blik in zien auge (es doe noe neit pas, dan houw ich dich op de pens) maar dolf oeteindelijk auch ’t ongersjpit. Noa 5 oer bluffen en gokken woare d’r nog twee pokeraers euver, die besjloate om de priezepot eerlijk te deile: Ludy Claessen en De Sjter 3-sjpeler Noël Maessen, dae op jeder kwajongen-toernooi sjteevast de weakest-link is en doa volledig parasiteert op ’t veurtreffelijke sjpel van kompaan Stefan Janssen, maar dae zich vriedig unne veurtreffelijke bluffer toonde. Noëls echtgenote Rilana leet zich ongertusje op de Ladies-Night bie de Poart ontvalle dat ze neit verbaasd woar dat Noël nog ummer neit d’r oet loog bie ’t pokeren: “Dat is typisch Noël. Bie mich wult ‘r auch nooit d’r oet.”

Euver dae Ladies Night bie de Poart gesjproake. Dae trok auch ‘n aantal De Sjter leden. En noe ligk ’t veur de handj dat dat vrouwelijke leden zeen. Maar veur de verangering woare ’t waer ens The Usual Suspects van de veteranen, Gerard M. en Ron M:

foto2

En hun gedraag op dae oavend woar al aeve veursjpelbaar. Gerard sjting de ganse oavend in zien rose humme bie al zien vrunj:

foto3

En Ron heel zich waer ens de ganse oavend op aan angermans vrouwluuj:

foto4

De veteranen woorte op de Ladies Night auch nog vertegenwoordigd door Will Leurs, dae veur de gelegenheid ’n t-shirt van Gerard Joling houw geleend:

foto5

Euveriges moosj Will Leurs al vriej vruig noa hoes vriedigoavend. Ron Marchal wis precies woarom:

foto6

Euver noa ’t voetballende gedeilte. Te beginne mit de Beesten van 5. Die sjpeelden lekker in ’t veurjoarszunke thoes taege Gelaen Zuid 6. De resultaten van os viefde de letste waeke zeen get wisselend. Al is waal dudelijk dat de sjtijgende lien is ingezat noa de winjtersjtop. Zondig kome de gasten oet Gelaen aanvankelijk nog op veursjprong. ’T woar echter Robin Janssen dae op prachtige wijze de geliekmaker aanteikende: unne geweldige poeier van 25 maeter dae in de linkerboavenhouk knalde. Doanoa begoosj “de grote Niek Savelkoul-show”. Deze A junior profileert zich al waekelangk veurtreffelijk es gastsjpeler van ut viefde en woar dit weekend bie bienoa alle goale betrokken. Eesj woar ’t Niek dae de verdediging van Gelaen onger druk zat, de bal zelf oppikte en auch zelf doeltreffend aafronjde.

Noa de rus woar ’t unne prima veurzet van Niek dae door topscorer Bob, in de sjtijl van Ruud Gullit in de EK-finale van ’88, woort binnegeknik. Ut viefde veel noa dae 3-1 veursjprong effe terugk en dat greep Gelaen aan om de score waer geliek te trekke. In de sjlotfase woar ’t echter opnuuj Niek mit unne puntgave assist op Jesse Grummer dae de besjlissende 4-3 scoorde. In de sjlotfase misten ozze mannen nog unne penalty, maar dat moch de pret neit drukke. De punten woare binne veur de Beesten van 5. Proficiat mannen!

Dan goan veer door noa de dames. Die moosjte zondigochtend aantraeje, oet taege OVCS. Unne ideale taegesjtenjer veur vedette Marwa, want taege Zittesje plouge kent zowel op de haerwaeg (laat ontbijtje) es op de terugkwaeg (lunch) de KFC aangedoan waere. Reporter Robin Martens koosj neit bie de wedsjtried aanwezig zeen (sinds heure partner Bart Linders geblesseerd is, hubbe ze hun waekelijkse intieme momentje verplaatsj noa de zondigochtend), dus wae gescoord haet bie de dames (aafgezeen van Bart dan) ken ich uch niet vertelle. Einige dat ich weit is dat de dames hunne wedsjtried mit 1-2 gewonne hubbe en dat ze doamit geine hekkesjleiter meer zeen. Al is de handj van interim-coach Tom de Keul sinds de winjtersjtop nog ummer neit ech zichtbaar bie de dames. Tom zelf doa euver: “Ich houd mich de henj ummer sjtief in de bokse-tesje. Veurdatse ’t wits, hubse kal.” De dames woare gelukkig waal nog bereid om ’t tweetal foto’s mit os te deile:

foto7

Van de dames is ’t unne kleine sjtap noa os meest aantrekkelijke heren-seniorenteam, ut veerde. Die sjpele ’t ganse seizoen hun thoeswedsjtrieje ofwel onger leiding van Piet Claessens ofwel van Tom Keulen. Aafgeloupe zondig hanteerde Piet de fluit. Kenny Lemmens mirkde veuraaf al op dat dat ’n goeie veurbode woar: “Mit de Keul pak ’t veerde nooit punten, allein pinten.”

De mannen van 4 begoosjte neit geweldig aan de wedsjtried, maar herpakten zich noa ongeveer un kwarteerke. En geliek woar ’t good old Pascal Conjour dae oet unne corner de 1-0 binne tikte. Tot aan de rust woare d’r vervolges kansen euver en weer, wovan de beste veur ut veerde woare. Unne killer veurin woort echter gemist.

In de rust sjloten Bob Schoutrop en Thijs Kemp van ut viefde aan. Dat koosjte de mannen van 4 goud gebroeke want zelf houwe ze d’r maar 11. Ut eesjte balcontact van Bob leverde geliek de 2-0 op. De zoepnaze dachten op dat moment dat ze d’r al woare en ze roke ’t deinblaad jupiler al. Taegesjtenjer Sjummert dach doa angesj euver en ging op zuik noa de aansjleitingstreffer. Dae koom d’r auch al vrie vlot en dat woar neit ens onverdeind. Noa get rommelig sjpel herpakte De Sjter 4 zich. Unne fantastische aanvaal koom oeteindelijk bie Danny Pepels dae unne veurtreffelijke veurzet goof, dae door Michael woort aafgemaakt veur de besjlissende 3-1. Noa aafloup knalden de beats waer lekker oet de speakers van Rick Kostons en woort in de kantine, onger ’t genot van menig juupke, nog effe noagekald euver de verdeinde euverwinning. Proficiat jonges!

Maar noe veer ’t toch euver ut veerde hubbe, wul ich auch effe van de gelegenheid gebroek make om ’n serieus ongerwerp aan te sjnieje. De letste twee waeke bereiken mich immers berichten dat bie ut veerde noa dit sezoen de sjtekker waal ens d’r oet zou kenne goan. Om oeteinloupende rejene euverwaege sjpelers te sjtoppe. En dat zou hartsjtikke zunj zeen. Ich hoap oprech dat de mannen van 4 zich biejein pakke en geweun kommend sezoen lekker blieve voetballe. Mesjiens mot d’r vanoet de vereiniging zelf zelfs get gedoan waere om dit team te behaute veur os clubke. ’T zou immers eeuwig zunj zeen om un team oetein te loate valle, dat jeder joar goud is veur un kwaart van de totale kantine-omzet en dat zowel op voetbal- es op sociaal gebied ’n aanwinst is veur de vereiniging. En dat zegk ich zonger enig cynisme. Bekiek die selectie geweun ens:

In de goal Royke Janssen dae zonne geweldige teamsjpeler is dat hae zich dit sezoen geblesseerd haet wie hae mit unne omhoal (!) unne corner wol veurkomme op de betonne mat van Caesar.

Es stand in veur Roy fungeert living legend Peter “de lange” Paes. De man, dae in dees versjlage waekelijks wurt bewierouk en wiejer gein toelichting behouf.

Wiejer besjik men euver Kenny Lemmens en Mark Janssen die neit allein ummer goud zeen veur ’n goeie dosis werklust, maar auch geweldig kenne zoepe, jedere vriedig troew Fortuna sjteune én auch ’n jeugdteam traine bie os vereiniging. En dat verdeint sowieso voal hulde!

Achterin make auch waekelijks Danny Pepels en Stan Ortmans hun opwachting. Stan is neit allein ummer bereid om op feeskes te zurge veur ’t baetere DJ-werk, maar traint bie os vereiniging auch de F4 wo in zien zeunkes Mika en Dyon voetballe en deit dat op ’n hartsjtikke leuke maneier. Zoon Mika liek in zien sjpel euveriges meer op ziene pap (meer terriër dan techniek), terwiel de technisch begaafde Dyon meer weg haet van ziene opa, oud Sjter coryfee Johnny Dietz. En Stans kompaan achterin, Danny Pepels, haet auch unne zoon dae ongetwiefeld binnekort bie ozze Mini F’s kump voetballe en doa door ziene pap getraind zal goan waere.

Op ’t middenveldj lup bie de zoepnaze van 4 onger angere Pascal Conjour rondj. De man dae zich qua techniek kent maete mit Ikram Moumni, qua sjpelinzicht mit Guido Cals en desondanks net zo hel kent zoepe es die angere zoepnaze. Auch Pascal haet unne zoon dae kommend sezoen ongetwiefeld bie de Mini F geit beginne. Dus auch Pascal zulle veer de kommende joare coachend langs de jeugdvelje zeen.

Dan de man dae veurluipig nog geine kleine haet rondjloupe bie De Sjter, maar dae waal jeder weekend goud is veur de muzikale omliesting bie ut veerde: Rick “The Voice” Kostons. Op ’t veldj unne onvermuijbare mandekker. En naeve ’t veldj ummer goud veur genog alcohol-consumptie, keihelle beats oet zien meziek-installatie en unne vol-oet mitgezonger smartlap op ziene tied.

En zo kense blieve doorgoan mit luuj bewierouke: Michel Beks, Roger Caubo, Oscar Nieskens, Sander Gorissen, Noud Claessens, Patrick Scheepers, Joey Notermans, Tom Janssen, Pedro Willems. Sjtuk veur sjtuk fenomenen, die veer es vereiniging neit kenne en neit wúlle missen. En dan hubbe veer ’t nog neit ens gehad euver ’t grootste fenomeen: sjpeler/coach Patrick Nordhausen. De man dae dit ganse zooitje al joarelangk biejein hilt, alles regelt veur de jonges en auch nog ens unne op en top clubman is.

Dus besjtuur van De Sjter, bie deze doon ich un beroep op uch: zet alles op alles om De Sjter 4 te behaute. Un sjoal bitterbel noa jedere thoeswedsjtried? Un gratis rundje jupiler op ziene tied? Wat mich betruf mot ’t allemoal kenne. ’T doel heiligt de middelen.

foto8

En noe sjnel door noa de angere teams. Angesj goan die van ut veerde zich dalik auch nog get meine. En dan krigse taferelen wie bie os driede: un gans sezoen sjtief ongeraan maar geweun de geuzen-naam “De Godenzonen” blieve drage. De mannen van drie moosjte voetballe taege SVM 2, thoes op ’t Hetjen. En de gasten oet Munstergelaen zouwe zich, bie un euverwinning, tot kampioen moage kronen. Maar d’r woar nóg un bezunjerheid aan deze wedsjtried: want dit woar tegeliekertied de aafsjeidswedsjtried van Maarten “El Capitano” Doek, dae helaas geit sjtoppe. Deze veurbeeldige back en aanvoerder haet kampioensjappe mitgemaak bie De Sjter 2 én De Sjter 3 maar haet besjloate om zich volledig op zien gezinslaeve te goan richten. Get wat veer ‘m vanzelfsjpraekend van harte gunnen.

Maar doamit zote de mannen van ut driede waal in unne sjpagaat zondig: ze wolle vanzelfsjpraekend enerzijds hunne captain ’n waardig vaarwel bezurge, maar houwe tegeliekertied instructies van Jo van Funs dat ze absoluut neit mochte winne: “Loat die van Munstergelaen maar lekker hun kampioensjap viere bie os in de kantine.” De mannen besjlote oeteindelijk maar ’t beste van beide werelden te keize. D’r woort 90 minute flink gaas gegaeve en SVM houw ’t nog aardig lestig. Noa 86 minute besjloot coach Habets ziene captain unne publiekswissel te gaeve. Maarten ging onger luid applaus noa de kantj en ziene brouer Ralph pinkte ’n troanke weg. Rene Gooren besjloot in de letste minuten nog effe op avontuur te goan en verseierde unne penantie. Coach Habets bedach zich gein seconde en brach Maarten waer terugk in ut veldj om in ziene aafsjeidswedsjtried te kenne scoren. En Maarten sjtelde neit teleur. Koelbloedig wie specialist Ralph benutte hae de penalty en brach de eindsjtandj op 4-1.

Mark Habets woar kort in zien analyse:

foto9

Om ut sezoen goud aaf te sjleite gingen de mannen van 3 nog effe door noa huize Maessen om doa in de tuin van Poker-champ Noël un feeske te boewe.

foto10

Van ut driede goan veer door noa ut tweede. Die mannen houwe unne oetwedsjtried taege Deurne op ’t programma sjtoan. Ozze jonges moosjte winne om oetzicht te houte op lijfsbehoud in de reserve hoofdklasse. Un nederlaag zou einde verhaal beteikene. En dus woort d’r op vriedigoavend keihel getraind. Maar doanaeve woar vriedig auch waer die relaxte, vriendsjappelijke sfeer te pruive, die de ploug al ’t ganse sezoen kenmerk en die auch haet geleid tot prima prestaties en leuk voetbal in deze hoogste reserveklasse. De luchtigheid woort vriedig verzurg door keeper Bastiaan Muijtjens en sjpits Marko Jevric, die effe wachtten tot de ganse selectie van 2 op ’t trainingsveldj sjting om vervolges alle tesje aaf te goan en bie jederein de boxershort d’r oet te hoale en te versjtoppe in de kas van verzurger Wesly Wanten, dae net op dat moment ein van de dames aan ’t verzurge woar mit gesjloate deur. Get wo Marko mit meer dan normale interesse haer keek:

foto11

Op zondigochtend om kwart veur 9 vertrok de bus van 2 veur de oetwedsjtried taege Deurne. En wát veur ein bus. Penningmeister Tom de Keul houw kosten noch muijte gesjpaard want ozze mannen reisden aaf mit de bus van de handjballers van de Lions:

foto12

De opdracht woar dudelijk veuraaf. D’r moch neit verloare waere. Un nederlaag van De Sjter en un punt van concurrent Volharding zou immers de degradatie inluiden. De reis verleep voortvarend en om teen oer reej de chauffeur ’n sjportcomplex in Deurne op. Dat zoog d’r echter nogal ermoedig d’r oet. Jari Knoops besjloot effe google maps te raadplege en concludeerde dat men bie de verkeerde club op de parkeerplaatsj sjting. Steve Krijgsman troaj vervolges op es navigator en loodste de bus noa ’t goeie complex. Doa aangekomme trof men ’n geweldig complex aan. Alles woar nog blauw-wit verseierd, vanwaege de derby dae unne daag eerder woar gesjpeeld tusje Deurne 1 en buurtgenoot ZSV 1. Deze derby woar bezoch door ’t bizarre aantal van 3.000 (!) toesjouwers.

Coach Crutzen heel ’n inspirerende besjpraeking en wees zien jonges d’r op dat d’r in jedere competitie ummer verrassingen zeen. “Loate veer dit sezoen zo’n verrassing zeen!” De opsjtelling van os tweede, dat ’t moosj doon zonger de geblesseerde Youri, zoog d’r es volgt oet:

Kis: Bastiaan

Achter: Steve, Cyril, Joep en Frusj

Midden: Amir, Charaf en Luc

Veur: Frank, Marko en Wesley

Bank: Twan, Bob en Jari

De Sjter begoosj prima aan de wedsjtried en creëerde de neudige kansen. Zo wie waal vaker dit sezoen woar men de baetere ploug maar vergoot men zichzelf te belonen. Noa un leuke eesjte helf van De Sjter kantj woort de rust bereik mit unne doelpuntloze tusjesjtandj.

Noa de rus begoosj os tweede zjwaak maar wis waal de nul te haute. Noa un kwarteier hersjtelde de ploug zich en kreeg zelfs ’n laevesgrote kans. Marko maak un geweldige individuele actie, sjpeelt zich vrie, kump allein veur de keeper en besjlut de bal breid te legke op de inloupende Joep. Helaas koosj d’r nog net unne verdediger van Deurne tusjekomme. Oet de doa op volgende counter scoort Deurne de 1-0. En neit voal later verdubbelde Deurne de veursjprong.

Ut tweede geef desondanks neit op en kump via unne sjieke aanval op 2-1. Unne mislukte sjeut van Steve kump bie Wesley Thompson terech. Dae geef unne helle, lege veurzet dae door Marko wurd binnegetik. Mit nog un kwarteier op de klok geit De Sjter alles of niks sjpele. Helaas houw men ’t gevuil dat alle sjeidsrechterlijke besjlissinge in ’t veurdeil van Deurne vele wodoor de ploug oet ergernis de neudige kaarten moosj incasseren en koom ’t sjlotoffensief neit ech van de grondj.

Noa ’t letste fluitsignaal koom auch nog ’t beroerde nuujts dat Volharding un punt houw gepak en dus woar os tweede officieel gedegradeerd. Desondanks kent men terugk kieke op ’n prima en veural heel leerzaam sezoen. Voal jeugdsjpelers hubbe kennis moage make mit ’t hoge niveau en deige dat prima, ’t sjpel woar bienoa jedere wedsjtried prima verzurg, de sfeer bleef goud tot ’t einde en ’t woar al mit al un leuke ervaring. Of zo wie Luc Spaans en Youri Voesten ’t tiedes de poker-oavend al samenvatten:

Youri: “Ach die busreizen zeen bes geinig. Zeker mit die juupkes en baco’s op de terugkwaeg.”

Luc: “Ut einige dat ontbrik is unne fritkaetel in de bus veur de hapjes.”

Youri: “Joa man, es dae d’r in zou zitte, dan reej ich mit alle liefde zelfs om de twee waeke noa Groningen toe om te voetballe.”

En coach Crutzen? Ging dae gebuk onger de degradatie?

Veer weite allemoal dat Rudy de ultieme winnaard is. Maar auch hae houw de degradatie zondigoavend al ’n plaetsjke gegaeve, getuge dees foto oet Café de Poart:

foto13

Van ut tweede goan veer door noa ’t hoofdgerecht van de zondig: de derby tusje de eesjte elftalle van GSV en De Sjter. Veur ozze eige jonges sjting d’r niks meer op ’t sjpel, behalve dan lekker op ’n goeie maneier ’t sezoen oetvoetballe. Taegesjtenjer GSV is noa de winjtersjtop flink aafgezak en zuut jeder waek de degradatiesjtreep korterbie komme.

De Sjter sjtartte in ’n opsjtelling die op un paar plaatsje gewijzigd woar. Poalo en Davy woare terugk van un sjorsing en nome de plekken centraal achterin in. En Ikram woar terugk van ’n blessure en moch geliek in de sjpits sjtarten in de plaatsj van Marko Jevric. Euveriges waor dat puur ’n besjlissing om ut tweede te versjterken. Marko houw immers al 14 keer in ut eesjte gesjpeeld dit sezoen en es hae taege GSV auch houw gesjpeeld, dan houw hae neit meer op 2 moage mitsjpele in unne potentieel belangrieke wedsjtried. Coach Czornyj houw Marko gaer loate sjtoan op 1, want doa houw hae ’t prima gedoan, maar Marko zelf vonj ’t auch baeter om te probere om ut 2e te behoeden veur degradatie. Sjoon om te zeen dat zowel sjpeler es coach van 1 ’t belang van 2 mitwaege bie hun besjlissing.

En natuurlijk is Ikram emes dae normaal ummer in de basis sjpeelt op 1, maar noa ’n aantal waeke aafwezigheid koom deze wedsjtried eigenlijk get te vruig. Auch Ikram wol echter zien teamgenoten neit in de sjteek loate en besjloot te sjpele. B-junior Sjoed van Mulken beheel zien basisplaatsj links achterin. De opsjtelling zoog d’r es volgt oet:

Kis: Esat

Achter: Roel, Davy, Paolo, Sjoerd

Midden: Stan, Ricardo, Guido

Veur: Hassan, Ikram, Thijs

Invallers: Bob Dukers en Luc Spaans

De wedsjtried begoosj dramatisch veur de gael-zjwarten, want GSV scoort al in de eesjte minuut de 1-0 oet unne corner. Vervolges ontsjpon zich in feite un kopie van de wedsjtried tusje beide plouge van veurig sezoen. Auch toen wol GSV absoluut neit voetballe en bleef ’t op eige helf hange. Noa twintig minute sjpele kump De Sjter op gelieke hoogte. Unne handsbal van GSV leidt tot unne penantie dae door specialist Ricardo wurt benut: 1-1.

Vervolges koom De Sjter waal nog unne keer goud weg wie un dood sjpelmoment van GSV op de poal gelandj. Doanoa woar ’t echter waer alles De Sjter wat de klok sjloog. ’T woar Thijs dae de wedsjtried oape brook mit un prima actie en dito veurzet, dae door de gans vriesjtoande Guido woort gepromoveerd tot goal: 1-2. Twee minute later woar ’t alwaer pries wie Stan allein op de keeper moch aafloupe en collegiaal breid lag op Thijs, dae de 1-3 koosj binneloupe. Daezelfde Thijs sjting aan de basis van de 1-4 mit ziene tweede assist van de middig. Unne deipe bal van heum op Hassan woort door dae letste koelbloedig aafgerondj.

Teen minute veur tied koom jeugdsjpeler Bob Dukers es invaller ’t veldj in. De multi-functionele Bob (dit sezoen bie zowel de A, ut 2e es ut 1e al in de verdediging, de veurhoede en op ’t middenveldj gesjpeeld) sjting nog gein minuut in ’t veldj wie hae deip woort gesjtuurd en beheerst de 1-5 taege de netten knalde.

Un prima euverwinning veur os eesjte elftal dat hiemit sjteef noa de 5e plaatsj. Veur taegesjtenjer GSV zuut ’t d’r minder florissant oet want die ploug zakte noa ’n noacompetitie-plaatsj. Loate veer echter hoape dat zowel GSV es auch Caesar (dat noe nét boave de sjtreep sjteit) zich veilig sjpeelt. Boete ’t feit dat ’t twee oetermate sympathieke en nette clubs zeen, is d’r immers niks leukers veur sjpelers en toesjouwers dan ’t sjpele van derby’s.

Veur os eesjte resten noe allein nog unne thoeswedsjtried taege mede-subtopper LHC en unne oetwedsjtried taege ’t op de 2e plaatsj bivakkerende Venlosche Boys.

En dan res os nog ein ploug dit weekend: de veteranen. Die kenden unne, veur hun doon, vrie rustige aanloup noa hunne wedsjtried taege de veteranen van Susteren. Doordewaek deilde captain Mat Creemers nog ens un foto van ‘m zelf in unne ouwe racewagen. Gerard Martens vonj doa in aanleiding om de wunsj oet te sjpraeke dat Mat zou goan sjtoppe mit voetballe. Ron Marchal kaatste de bal echter terugk en boaj Gerard un alternatief veur de zoaterdigmiddig:

foto14

Later in de waek koom d’r heuglijk nuutjs van veteranen-veurzitter en doelman Rene Hillen dae un filmke deilde wo op ziene zoon Wesley en diens vriendin aankondigden dat ze in november ’n kindje verwachten. De reacties sjtruimden vervolges binne:

foto15

En ’t doerde vanzelfsjpraekend auch neit heel lang veurdat d’r get minder serieuze reacties kome, wo onger de waekelijkse verwiezing van Willem Thewissen noa ’t feit dat Rene’s vrouw Yvonne, zien ex is:

foto16

Rene leet auch zeen euver zelfsjpot te besjikke, noa ’n opmerking van Jos Driessen:

foto17

En es kers op de taart koom d’r de felicitatie van Ron Marchal, dae ’n veursjpelling deig euver de genetische samensjtelling van ’t aansjtoande kleinkindj:

foto18

Ron woar euveriges toch al in vorm qua quotes de aafgeloupe waek, zo wis auch Dennie Vorstermans te vertelle. Dennie en zien lieftallige Miriam houwe Ron getroffe op ’n communiefeeske. Doa houw Miriam zich net ’n sjtuk vlaai op unne teijer gelag, wie Ron langsleep en zei: “Pas op kindj, vraet dichzelf neit oet de mert, he.”

De veteranen verzamelden zich ruum veur ’t begin van de wedsjtried in de kantine. Wie Robert Lucassen binnekoom zei Ron taege coaches Leon en Frans: “Dae woar same mit mich in de Poart gistere pes drie oer, trainers. Zet dem auch maar d’r naeve.”

Robert dach echter waal mit die nachtelijke escapades weg te komme omdat hae Annelies, de vrouw van coach Frans, nog mit de fits houw thoesgebrach vriedignach. Frans woar doa echter minder te sjpraeke euver.

Frans: “Wie laat woars doe thoes gistere?”

Robert: “Wie laat woar Annelies thoes?“

Frans: “Neit zo biedehandj doe! Wie laat woars doe thoes?”

Robert: “Nae serieus, wie laat woar Annelies thoes?”

Frans: “Om veier oer pas.”

Robert: “En ich ben om twee oer vertrokke mit heur hahaha.”

Frans: “Kom doe de eesjte helf maar naeve mich op ’t benske zitte.”

Robert herhoalde dat gesjprek mit Frans vervolges in ’t kleidlokaal, wo hae ’n geweldige reactie kreeg van Ron Marchal. Maar die verdeint ’t om es aafsjleiter van dit sjtuk te fungeren. Dus effe geduldj nog. Want gevoetbald woort d’r auch nog. De vets moosjte aantraeje zonger sjterkhouwers Marc “Fortuna4Life” Lacroix, Stef “King” Conjour, Thijs “Kwarteerke” Otten, Piele “De Indiaan” Smeets en Willem “Mr Universe” Thewissen.

De eesjte helf woar De Sjter heer en meester. Taegesjtenjer Susteren sjpeelde sjlordig en dus woar d’r veelvuldig balbezit veur de Sjteindenaere. Oet unne pass van Rob Schulpen Lobde Robert Lucassen de bal taege de lat. Effe later woar ’t waal raak. Dennie Vorstermans kogelde mit zien chocoladebein op goal, de rebound veel veur de vuit van Rob Schulpen dae zelf wol binnesjuve maar toen inens dwingend heurde ‘breid!’. Dat woar de sjtum van Jack Linders. En es de nummer 1 in de pikorde dich coach, dan veurse dat oet. En dus ging de bal breid en sjoof Jack de 1-0 binne. Veur de rus wis auch Susteren nog unne bal op de lat te mikken en sjoot de sjriever van dit sjtuk nog unne vrieje trap taege de boavekantj van ’t vangnet. “Of dat waal auch in ’t versjlaag vermeld ging waere”, vroge zich geliek 5 medesjpelers aaf. Bie deze, jonges. En wie ich in de rus al zei: “Ich hub mien ganse laeve nooit unne vrieje trap moage numme en sinds zoaterdigmiddig weit ich woarom.”

In de eesjte helf woar Will Leurs oetgevalle mit ’n sjpierblessure. In de rus woort door medesjpelers bezurg geïnformeerd wie ’t ging mit Will, wonoa oet 13 kaele tegeliek klonk: “Num maar gein risico, Will. Minimaal un hauf joar rus haute mit zoget.”

De tweede helf trok Susteren auch lekker ten aanval en dat resulteerde in unne oape wedsjtried. Susteren raakte tweemaal de lat en aan de angere kantj deig Robert Lucassen dat zelf auch veur de tweede keer oet unne prachtige lob. Rene Hillen redde nog unne keer geweldig in ‘n 1 taege 1 situatie. En aan de angere kantj kreeg De Sjter auch de neudige kansen. Oeteindelijk besjliste Robert Lucassen de wedsjtried mit unne geweldige poeier in de boavehouk: 2-0.

Noa de wedsjtried woar d’r get ondudelijkheid. In eesjte instantie zou de kantine neit oape zeen en houw Ron aete bie de Poart geregeld. Doanoa woar de kantien toch oape en zouwe veer eesj doa get drinke om vervolges bie de Poart te goan aete. En toen koom waer berich dat Pedro van de Poart dach dat d’r gein aete geregeld houfde te waere omdat de kantine oape woar. Coach Leon “Pep” Fredrix vatte ’t gebeure treffend same:

foto19

Euveriges heurde ich dit weekend op de jeugdvelje auch van unne veteraan van Catsop dat dees versjlage doa gelaeze waere. En dat hun woar opgevalle dat Willem Thewissen al waeke wurt achtervolg vanwaege ’t feit dat hae taege Catsop op unne taegesjtenjer houw geroupe: “Loup dalik maar effe langs, dan houw ich dich die naas waer rech.” Un terechte constatering. En effe woar ich bang dat d’r dees waek ’n einde zou komme aan verwiezinge noa die opmirking van Willem. Totdat, wae angesj, Ron Marchal op moandigochtend mit un treffende samenvatting van de wedsjtried taege Susteren koom:

foto20

Dennie Vorstermans bleek ’t euveriges neit gans ens te zeen mit die analyse en reageerde:

foto21

Mat Cremers woar dat geneuzel euver biezaken zat en vroog aandacht veur de hoofdzaak, die op de achtergrondj dreigde te raken:

foto22

En doamit koom d’r waer ’n einde aan ’n sjoon weekend veur os vereiniging. Un weekend mit unne lach om alle flauwekul en om de voale euverwinningen, maar auch un weekend mit un troan vanwaege de degradatie van ut tweede en ut sjtoppe van Maarten Doek. Res os nog maar eind dingk:

Robert Lucassen houw dus un gesjprek gehad mit coach Frans euver ’t feit dat hae Annelies van Frans thoes houw gebrach vriedigoavend. Robert houw aan Frans gevroag wie laat Annelies thoes woar. Wie Frans ‘4 oer’ zag, houw Robert gezag dat hae al om 2 oer mit heur vertrokke woar bie de Poart. Dat gesjprek houw onger veier auge plaatsjgevonje. Robert vertelde d’r echter euver in ’t kleidlokaal veur de wedsjtried van de vets. En wat toen volgde woar de beste opmerking van dit weekend, op naam van, wie kent ’t auch angesj, Ron Marchal:

Robert: “Dus ich zegk taege Frans ‘en ich ben om twee oer mit heur vertrokke’ hahaha.”

Ron: “Joa, zonne fits hub ich auch gehad.“

Pes volgende waek!

Rob Sjulpe

 

 

 

 

 

 

 

Bestel de clubhanddoek

klik op de banner
club handoek 2020 banner

rksv de ster walking football 2018 1x250

ster webshop links 250

blessurehulp left banner

De Ster Nieuwsbrief - Blijf op de hoogte!

Deze website maakt gebruik van cookies om voorkeursinstellingen bij te houden en analytische cookies om de website te optimaliseren.