Wedstrijdverslagen

Qua resultaten woar ‘t ’n geweldig weekend veur os vereiniging. D’r woorte heel voal punten behoald door de versjillende teams. Ut eesjte boekte ’n doelpuntriek gelieksjpel in Mesjtreich taege Geusselt Sport. Ut veerde wis thoes te winne in ’n nóg doelpuntrieker duel, taege Geulsche Boys 2. Ut viefde deig ’t zelfs nog baeter door kampioenskandidaat Obbicht 2 te kloppe. En auch de dames pakte de volle buit in hunne thoeswedsjtried taege Hulsberg.

Einige dissonanten dit weekend woare ut driede en de veteranen. Ut driede moosj de meerdere erkennen in Urmondia 2. En de veteranen houwe ’t puur en allein aan de heldhaftige insjpanninge van De Lange Paes te danke dat hun nederlaag taege RVU beperkt bleef.

Voal goale en voal punten dus dit weekend. En dat in ’n waek die nog dramatisch leek te beginne. Want aan ’t begin van de waek ginge d’r geruchten dat os aller Peter Paes get versjrikkelijks woar euverkomme. Hie en doa woort zelfs gesjproake van ’n aafraekening in ’t criminele circuit. Dat zoget in Sjtein zou gebeure houw nemes ooit gedach. En dan auch nog ein van Sjteins ‘finest sons’ es sjlachtoffer. Versjrikkelijk geweun.

Aanvankelijk noom ich de geruchten neit ech serieus. Maar wie mich dees foto bereikte, sjloog mich de sjrik om ’t hart:

foto1

T roerloze lichaam van Peter in unne pisbak in un Sjteins café… versjrikkelijk geweun. Op ’t plissebureau woort groot alarm gesjlage en ging de sjpeurtocht noa de dader van sjtart. Of baeter gezag: noa de opdrachtgaever. Want dat dit woar oetgeveurd door unne huurmoordenaer oet ’t oostblok woar waal dudelijk. Maar wae zou noe in godsnaam opdracht hubbe gegaeve hietoe? Dit moosj bienoa waal ’n daad oet pure jaloezie zeen. Emes dae vruiger ummer in the picture sjting bie De Sjter, maar dae noe veurbiegesjtreef woar door Peter, en dae dat neit koosj verkroppen. En ’t moosj natuurlijk emes zeen mit cente. Want zonne hitman inhure kos natuurlijk unne aardige cent. En dus woort bie veurzitter Anton Roest ens geïnformeerd wae de dikste auto rit bie os clubke. Anton herinnerde zich op dat moment dat hae twee waeke geleje nog emes in unne dikke auto houw gezeen in ’t waekversjlaag. En veur de res voldeig dae auch waal aan ’t signalement. De gezet kreeg auch al sjnel loch van de verdachte en dus kopte ’t Limburgs Dagblad aafgeloupe gounsdig:

foto2

Gelukkig bleek unne daag later dat ’t allemoal op ’n misversjtandj berustte. Peter Paes laefde nog. En de oostblok-benj van Jan de Weijer bleke neit wiejer te goan dan unne Poolse sjtucadoor dae 12 joar geleje bie Jan verboewd houw en un 21-joarige Oekraiense die Jan in zien ‘glory days’ ens op de Reeperbahn in Hamburg houw getroffe.

Un zucht van verlichting ging door de ganse vereiniging. Maar al sjnel sjloog jederein de sjrik waer om ’t hart. Want daags noa ’t euverlieje van muzikant Prince ging d’r op facebook ’n screenshot rondj van de favoriete nuujtslaezeres van Frans Beaujean, die opnuuj ’n triest bericht oet de meziekwereld brach. En waal euver ozze eige nachtegaal Rick “The Voice” Kostons.

Maar auch hie bleek ’t gelukkig, veur degeinen die de tekst baeter deige laeze, om ’n grap te goan:

foto3Noa al die verontrustende berichten woar ’t hoog tied veur get luchtigs. Gelukkig houwe de sjpelers van 2 zich ’n tiedje geleje al loate invalle dat ze aafgeloupe vriedig ‘n ‘beerpong’ toernooi ginge organisere. Dat haet mesjiens enige oetlegk neudig. Beerpong is ’n Amerikaans sjtudenten-zoepsjpelke dat is euvergewejd noa os landj. Twee teams van twee sjpelers sjtoan aan beids kenj van un lange toafel, mit veur zich ’n paar hauf volle baekers beer. Beurtelings probere de sjpelers ’n pingpong-belke mit eine sjtuter in ’n baekerke van de taegesjtenjer te mikke. Es dat luk mot ’t angere team dae baeker laegdrinke. Dat kent dus bes hel goan. Zeker es ’t toernooi van hauf teen pes hauf drie doert, zo wie deze vriedig.

Veurig joar woar auch al ’n beerpong toernooi gesjpeeld. Winnaars Jari Knoops en Roel Heffels verdedigden dit joar hunne titel. Grootste oetdagers veuraaf leek ’t dames-duo Minou (vriendin van Jari) en Bo (zuster van Jari) te zeen. Al woar ’t allein al vanwaege ’t simpele feit dat Jari zó sjerp is op Minou en Roel zó sjerp is op Bo dat ze zich van z’n laevesdaag neit zouwe kenne concentrere.

De muzikale omliesting woort verzurg door Sjteins populairste keeper, DJ Nick Kohlen. Euveriges is Nick deze zondig kampioen gewoare mit Urmondia. Proficiat Nick! ’T Beerpong-toernooi kende ’n grote mate van gezelligheid, gepaard mit ‘n oetermate sjpannend verloup, getuge dees foto’s:

foto4

En noa ’n lang toernooi koom ’t oeteindelijk aan op vroag wae letterlijk nog ‘the last man standing’ woar. Want unne lange slijtagesjlaag leidde oeteindelijk tot un finale tusje titelverdedigers Roel en Jari, taege oetdagers Youri Voesten en Wesly Wanten. Euveriges woar Youri ’t toernooi begoosj mit Wesley Thompson es teamgenoot maar wie dae horizontaal noa boete woar gesjleip, woar Wesly Wanten neit te beroerd om in te valle. De finale woar sjpannend tot de letste worp. Maar oeteindelijk koosj d’r maar ein team de beste zeen:

Eesj woorte de verleizend finalisten gehuldigd (dames let veural effe op de biceps van womanizer Wesly):

foto5

En tot sjlot woorte de winnaars volkomen terech auch nog in ’t zunke gezat:

foto6

Proficiat Roel en Jari! Al blif ’t verdach dat jeder toernooi dat bie os vereiniging wurt georganiseerd, gewonne wurt door de organisatoren. Of ’t noe om Patrick Nordhausen en Oscar Nieskens bie ’t pokeren geit of om Jari en Roel bie ’t beerponge. ’T liek allemoal verdach voal op doorgesjtoake kaart.

Hoog tied om ens door te goan noa de wedsjtrieje van dit weekend. En dees waek beginne veer ens mit ut driede. De troewe laezers van dees versjlage weite dat os driede al ’t ganse sezoen neit lekker dreijt. Sinds de ploug zich op 7 september van veurig joar al veilig sjpeelde (es gevolg van ’t terugktrekke van 2 plouge) is de klad d’r in gekomme. Sjpelbepaler Rene Gooren is de eesjte helf van ’t sezoen geblesseerd gewaes. Veursjtopper Usman Kahn kump dekker neit dan waal, en es ‘r d’r is dan wit hae te melje dat zien contactlenzen nog ummer ongerwaeg zeen oet Ankara en dat hae dus op 23% gezichtsvermogen sjpeelt. De AVRO haet in heur programma ‘Vermist’ al 3 oetzendinge gewijd aan Jos Ostendorf, maar tot heden nog ummer zonger resultaat. En es coach Mark Habets ens un weekend neit mit ziene zaate kop thoeskump en unne bloumpot (mit un gaetje aan de ongerkantj) volzeik, dan brik hae waal ziene vout bie ’t make van ’n sliding (in november) of bie ’t aafsjtappe van de fits (in april).

Ut is kortom ’n sezoen om sjnel te vergaete veur de godenzonen van drie. Desondanks ginge de mannen dit weekend auch waer vol goeie mood op waeg noa Urmond veur unne oetwedsjtried taege ’t lokale 2e elftal. Die ontmoeting haet euveriges ’n klein veurgeschiedenis. Want eigenlijk houw deze wedsjtried op poasjzoaterdig gesjpeeld motte waere, maar toen houw os driede neit genog man. Dat woar netjes op tied gemeld bie de KNVB en bie Urmondia. Desondanks sjting dae daag om 11 oer al op voetbal.nl de tekst ‘BNO’ (bezoekers niet komen opdagen). Enigszins veurbarig veur unne wedsjtried dae om 1 oer pas zou beginne. En doabie: d’r woar netjes op tied aafgebeld. Maar de KNVB woar onverbiddelijk en trok os driede hun einige drie behoalde punten aaf. De mannen woare dus vandaag op wraak oet.

Coach Mark Habets woar aafwezig vanwaege ’t communiefees van ziene zoon, River. Rene Gooren noom es interim-coach de honneurs woar en kreeg geliek mit personele problemen te make. D’r woare waer heel get aafmeldingen, zo houw de sjriever van dit sjtuk al doordewaeks geconstateerd wie hae luuj van 2 probeerde te charteren veur ’t verzurge van de ienie mini-traininge op zondigochtend:

foto7

En effe later leet coach Habets in ‘n perseunlijk bericht weite welke sjpelers hae van De Sjter 2 coach Rudy moch benadere om oet te helpe. De sjriever van dit sjtuk woar doa neit van onger de indruk. Get wat Mark vervolges auch moosj bekenne:

foto8

En auch interim coach Rene houw doordewaeks versjterking geregeld: bie de B-jeugd, wovan hae trainer is. B-junioren Brian Haenen en Erwin Janssen maakten vandaag hun debuut bie de senioren en hun ploeggenoten Bas Daemen en Joep Hügel holpe al vaker oet dit sezoen. Alle veier sjpeelden ze vandaag, noa de meining van de vaste sjpelers van 3, unne hele goeie pot en woare ze échte versjterkingen. Klasse jonges!

Coach Rene leet zien ploug vandaag in de vertroewde 4-3-3 acteren. Wie ozze jonges al kloar sjtinge om te beginne kome die van Uermund aan dat de wedsjtried later moosj beginne omdat ’n paar sjpelers van hun later woare. ’T vermoeden achteraaf is dat dae tied henjig gebroek woort om de sjeidsrechter van deins te instrueren wie de wedsjtried moosj verloupe…

De eesjte teen minute woare veur Uermud die get feller woare en de bal lete goan. Noa unne sjtaekbal dook d’r unne sjpeler op veur keeper Kai. Dae sjpeelde de bal langs Kai, maar ozze keeper koosj zien lichaam henjig veur de aansjtormende sjpits dreije. Doa op woort Kai mit twee henj in de rugk omgeduujd, veel, en noom unne sjpeler van Uermund mit in ziene val. De sjeids floot. Alle 22 sjpelers nome doa op al hun plaatsj in, in aafwachting van de vrieje trap veur Kai. Allein de sjeids van deins bleef maar doorloupe noa de 16 en wees noa de penalty-sjtip.

De penalty woort benut en effe later scoorde Uermund auch nog de 2-0 oet unne sjoon oetgesjpeelde aanval. De wedsjtried leek gesjpeeld. Maar de gaelzjwarten sjakelden un tendje bie en vanaaf dat moment keerde de wedsjtried 180 graden. De res van de wedsjtried sjpeelde zich aaf op de helf van Uermund en ut driede kreeg beheurlijk get aardige kansen. Oeteindelijk woort de aansjleitingstreffer gescoord door Rene Gooren, oet zien specialiteit: unne vrieje trap in de driehouk. Veur rus woare d’r auch nog kansen op de geliekmaker. De pauze woort echter bereik mit unne 2-1 tusjesjtandj.

De tweede helf ging ’t sjpel get op en neer en beide plouge krege kenskes. De godenzonen van 3 houwe zeker de geliekmaker verdeind. Al woar ’t allein al om ’t helle wirke dat ze allemoal deige. Helaas lukte ’t neit om d’r nog eine bie te prikke. Desondanks woar ‘t ’n prima prestatie van os driede. De waeg omhoog liek ingezat!

Van ut driede sjakele veer euver noa de veteranen. Die houwe unne oetwedsjtried taege RVU op ’t programma sjtoan. De wedsjtried moosj aafgewirk waere zonger coaches Leon (wederom op vakansie aan zien huwelijk aan ‘t wirke) en Frans (pas later aanwezig vanwaege zonnepanelen die hae op zien daak moosj legke). Willem Thewissen houw lang noagedach en contact gezoch mit unne ervaren vervanger… nemes minder dan Jack Dassen. Dae reageerde positief op dat verzuik:

foto9

Goud, unne goeie coach woar dus geregeld. Noe nog genog sjpelers… want op zoaterdigochtend meljden zowel Mat Creemers es Ron Marschal zich aaf mit spit in de rugk. Get wo Mat unne daag later bliekbaar wonderbaarlijk van genaeze woar, wie hae greutsj poseerde in unne racewagen:

foto10

En auch in de kantine bie RVU woar d’r al weinig te mirke van dae spit bie Ron en Mat, aangezeen ze in rus nog veursjtelden aan de bardame om noa aafloup effe noa achtere te goan veur un trio. Wie Mat echter noa de wedsjtried geliek gevloage woar zei Ron verontsjuldigend taege diezelfde bardame: “mevrouw dat trio kent helaas neit doorgoan. Ich hub weliswaar álles mit, maar twee piemele hub ich helaas neit.”

Auch Dennie Vorstermans koosj neit voetballe. Al houw dae waal ’n goud excuus. Dennie sjpeelde namelijk ziene allerletste wedsjtried veur zaalvoetbalteam AEV en woort noa aafloup gehuldigd door zien ploeggenoten mit unne champagnedouche in ’t kleidlokaal en ’n feeske bie Tillie van de Bekker:

foto11

T woar auch Gerard Martens opgevalle dat d’r waal erg voal aafmeljinge woare. Dae sjting in de kantine te wachte veur ’t vertrek wie Will Leurs koom binnewanjele.

Gerard: “Godverdomme Will, alle goeie melje zich aaf en doe blifs geweun komme!”

Vanwaege alle last-minute aafmeljinge wis Willem Thewissen effe neit meer zo goud of veer genog man houwe en dus woort Ron Frijters gevroag om oet te helpen. Ron koom vol goeie moud noa Rothem maar woort binne twee minute ’t kleidlokaal waer oetgejaag door Gerard Martens.

Gerard: “Wat mot dae Frijters hie? Wae haet dem gevroag?”

Willem: “Ich. Aangezeen ich de beste sjpeler ben, hub ich dat rech.”

Eddy: “Doe hubs in jeder geval ’t meeste zelfvertroewe joa.”

Gerard lag zich echter al sjnel neer bie ’t mitsjpele van Ron en in de rus zote de twee zelfs naevenein gebroederlijk ’n sigaretje te rouke in ’t kleidlokaal:

foto12

In de goal zoaterdig sjting, bie aafwezigheid van Rene Hillen, nemes minder dan Peter Paes. Al mot waal gezag waere dat dae ’n bietje naeve de sjoon begint te loupe sinds hae in dees versjlage get vaere in de vot haet gekrege. Want veur de wedsjtried meinde Peter zich in de kantine geweun effe ’n paar pinte te kenne pakke:

foto13

Mit dees biejeingeraapde selectie woort aafgereis noa ’t sjportpark van RVU. Stef Conjour houw bliekbaar in de kantine auch al get pinten gehad. Angesj ken ich ’t neit verkloare dat hae bie ’t veur-oet inparkeren ’t laevesgrote welkomst-bord op ’t complex van RVU euver de kop zoog:

foto14

De wedsjtried van de vets van De Sjter en RVU woar ’t neit waert om al te voal weurt aan voel te make. De Sjter woar de baetere in de eesjte 45 minute. RVU doanoa. De rus woort bereik mit unne ‘noel-noel’ tusjesjtandj.

De tweede helf begoosj wie gebroekelijk: mit grensrechter Willie Worms nog in de kantine. Vlak veur ’t begin koom Willie aanrenne, pakte de vlag en sjtelde zich op. De sjeids floot om te beginne en RVU trapte aaf. Roger Daemen wees Willie op ’n belangriek detail.

Roger: “Willie, doe sjteis aan de verkeerde kantj, mannuh!”

Willie: “Watte?”

Stefan: “Doe mos aan de angere kantj sjtoan.”

Willie: “Och godverrrrdomme!”

Vlak noa rus kreeg De Sjter unne penalty wie Stefan Janssen ongeroet woort gehoal binne de 16. Ron Frijters pakte de bal geliek en sjoot soeverein ziene eesjte treffer veur de vets binne. Willem Thewissen doa euver noa aafloup: “Ron, doe leeks waal Vincent Janssen bie ’t opeisen van de penalty.”

Euveriges leet coach Jack Dassen zich langs de lien auch goud gelden wie Ron kloar sjting om dae penalty te numme. Jack houw effe gemis wat d’r gebeurt woar en zoog 7 gael-zjwarte sjpelers rondj de 16 sjtoan. Dat beveel Jack neit. Hae sjting op en leet zich heure.

Jack: “Jonges, godverdomme, geer sjtoan voals te wiet noa veure allemoal!”

Willem: “Jack, ’t is penalty, jong.”

Jack: “Och, godnondejuu, dat houw ich gemis.”

Maar in de letste 20 minute woar ’t RVU dat twee keer scoorde en doamit de winst binnesjleipde. Noa aafloup woort in de kantine van RVU nog effe noagekald. Will Leurs bedach zich net dat hae de ganse waek nog gein ein opmerking houw gekrege euver pornofilms of euver die oprit die hae nog ummer moosj fatsoeneren thoes. Totdat Willem Thewissen get inveel, wie ’t gesjprek net ging euver oud-veteranen-sjpits Ruud Waanders.

Willem: “Jonges, veer hubbe ummer sjtroatemakers in de sjpits bie de veteranen. Eesj de Waander en noe Will Leurs.”

Vervolges koom ’t gesjprek op Rene Hillen dae mit zien vrouw Yvonne ’n weekendje weg woar. Yvonne is de ex van Willem Thewissen, zo wie al vaker gemeld.

Willem: “Jonges, wat is Rene Hillen noe eigenlijk van mich? Unne volle sjtief-zjwoager?

Ron: “Nae, unne koekoek.“

Willem: “Koekoek?“

Ron: “Ja, die legke toch hun eier in ’t nes van unne angere.”

Willem: “Haha sjiek.”

Ron: “Of ja, eigenlijk bes doe unne koekoek en Rene is noe dien eier aan ’t oetbroeden.”

En mit die sjteingoeie opmerking van Ron goan veer door noa ut viefde. Dat moosj op bezuik bie kampioenskandidaat Obbicht 2. In Obbicht houwe ze de champagne al ingekoch want ’t kampioensjap leek binne handjbereik. En dan zou de wedsjtried taege De Sjter 5 neit meer dan ’n klein höbbelke op de waeg noa ’t kampioensjap zeen. Zo dach men althans in Obbicht.

Auch aan de warming up woar ’t versjil in ambities dudelijk aaf te laeze. Die van Obbicht deige fanatieke positiesjpelkes en serieuze aafwirkoefeninge. En De Beesten van 5… Robin Storms dronk zich in de kantien op dat moment nog ’n pilske, ’n paar sjpelers sjpeelden ’n maelig sjpelke, en waer ’n paar angere woare get bel taege ’t vangnet aan ’t sjuppe.

Vanaaf de aaftrap noom Obbicht het initiatief. Al uitte zich dat veural in ‘t 100x euversjpele op 40 maeter van de goal de ganse wedsjtried. De beesten van 5 bekeke zich dat ens rustig en besjlote sjluw te wachten op de kenskes die in de 6e reserve klasse ummer komme, es unne taegesjtenjer ’n fout maak. En die foutjes kome d’r auch. En op die momenten woare ozze mannen d’r es de kippen bie om dat lekker op z’n Italiaans oet te countere. En noa ’t hauf oer houw dat al geresulteerd in 2 treffers van Bob Schoutrop.

Vlak veur rus scoorde Obbicht de aansjleitingstreffer. De mannen van 5 bleven echter doon wat ze de ganse wedsjtried al deige: aafwachte, fel ballen verovere en razendsjnel oetcountere. Obbicht wis doa weinig oetgesjpeelde muigelijkheden taegeneuver te zette. De eindsjtandj van 2-4 in ’t veurdeil van de Beesten van 5 woar dan auch volkomme terech. Grote man aan de kantj van De Sjter woar Bob dae alle 4 de treffers veur zien raekening noom.

Van ut viefde goan veer door noa de dames. Die sjpeelden unne thoeswedsjtried taege Hulsberg en deige dat in de volgende opsjtelling:

foto15

Ozze ladies sjote oet de sjtartblokken en noa 8 minute sjting ’t al 1-0 veur De Sjter via ’n doelpunt van Siri. Van dae veursjprong koosj helaas neit lang genoate waere want in de 16e minuut scoorde Hulsberg de 1-1. De eesjvolgende doelpoging woar unne poeier van Rachel dae helaas net euver ging. Mit de 1-1 sjtandj woort de rus bereik.

In de rus woort d’r get gewisseld. De tweede helf ging geliek op maar ’t woare ozze ladies die op 2-1 kome via unne treffer van Joy. ’T bericht euver die goal leet reporter Robin Martens volge door un mysterieus bericht:

foto16

Ich weit neit precies wat ich doavan mot make, maar dae emoticon mit de tong oet de moel wek enige licht-erotische vermoedes.

Op de bank houwe de dames voal sjpas om dae veursjprong. Om te veurkomme dat ’t ens ein waek neit op ’n kippenhok leek in de dug out, houwe de dames aafgesjproake dat maar 1 emes tegeliek moch kalle. De dames deige dat oet sympathie veur coach Tom de Keul, dae de aafgeloupe waeke raat-gek woort van ’t gekakel op de bank. Oet veurzurg woar Tom dees waek dan auch al unne maeter of 17 van de dug out aaf goan sjtoan om te coachen. Gelukkig houw Robin de tele-lens bie zich, zodat ze Tom toch nog net op de foto koosj vaslegke:

foto17

De wedsjtried eindigde oeteindelijk in ‘n 2-1 euverwinning veur ozze dames. Woman of the match woar volges alle aanwezigen Maartje, die op basis van heur sjpel in deze wedsjtried un sjtandjbeeld verdeint op ’t Hetjen. Sem en Marwa vierden de dikverdeinde euverwinning op passende wieze, bie KFC:

foto18

Un topprestatie van ozze ladies, die dus net zo wie de mannen van 5 de volle buit binnehoalden dit weekend. Ens sjnel kieke of de zoepnaze van ut veerde doa auch toe in sjtoan woare. De berichten en veural de foto’s van zoaterdigoavend bie Tillie beloafden weinig gouds:

foto19

Ut veerde kreeg vandaag hulp van Jari Knoops dae niks te voetballe houw mit ut tweede. Euveriges moag Jari dees waek zeker waal ens effe in ’t zunke gezat waere. Eesj organiseerde hae op vriedig immers ’t beerpong-toernooi, same mit Roel, en vervolges holp hae op zondigochtend bie ’t traine van de Ienie Mini’s (same mit Bart Linders, woveur auch dank!) en tot sjlot geit hae op zondigmiddig auch nog bie ut veerde oethelpe. Unne echte clubman dus. En doa moag Jari bes ens un dik compliment veur kriege. En doamit is ‘t auch geliek dudelijk dat Jari zien basisplaatsj bie ut tweede neit alléin maar te danke haet aan ’t feit dat zien mam mit de trainer van 2 vriejt…

Maar goud, veer houwe ’t euver ut veerde. Un flinke delegatie van de zoepnaze houw zich dus op zoaterigoavend goud geammeseerd bie Tillie. En op zondig ging dat feeske geweun door in de wedsjtried taege Geulsche Boys 2. Want al sjnel kome de mannen op unne 1-0 veursjprong via de einige sjpeler aan Sjter-kantj mit ’n alcoholpromillage onger de 4.5 én ’n cholesterol-gehalte onger ’t lanjelijk gemiddelde: Oscar Nieskens scoorde op prachtige wijze.

Doanoa noom Geulsche Boys effe ut initiatief euver. Zelfs heldhaftig optraeje van Peter Paes, dae zich wie Peter Schmeighel in zien beste joare veur jedere sjeut sjmeet, koosj neit veurkomme dat De Sjter op 1-2 achter koom. Vlak veur rus woar ’t echter opnuuj Oscar, dae op aangaeve van Patrick Scheepers de 2-2 aanteikende.

Noa de rus leep Geulsche Boys eesj waer oet noe 2-4 en leek de wedsjtried gesjpeeld. De Sjter noom echter ’t initiatief euver en ging lekker voetballe. Eesj woar ’t Jari dae oet unne vrieje trap de 3-4 scoorde. De Sjter ging alles of niks sjpele en dat resulteerde in twee goale van G.I. Kenny, wodoor de zoepnaze inens waer mit 5-4 veur sjtinge. Pascal Conjour gooide vlak veur tied de wedsjtried op sjloat door unne assist van Kenny binne te tikken.

De behoalde punten woorte gevierd mit meziek oet de Ghettoblaster, dae tot in Geulle heurbaar mot zeen gewaes. En noa aafloup woare d’r auch in de kantine allein maar sjtroalende gezichte. En dus woort, noa ’t waekske aafwezigheid, waer ens geposeerd veur ’n zoepnaze-groepsfoto. Zelfs Wout Poels, dae op de tv op de achtergrondj net Luik-Bastenaken-Luik wint, kreeg effe totaal geine aandacht tiedes dit gelukzalige foto-momentje. Klasse mannen!

foto20

En dat bringk os bie de letste wedsjtried van dit weekend. De wedsjtried van os eesjte elftal taege ein van de leukst voetballende, maar auch geliek ein van de minst sympathieke plouge oet de 2e klasse, Geusselt Sport. Aan dat weinig sympathieke kenne die jonges euveriges auch maar weinig doon. ’T blieve immers Sjenge.

De weergoden besjlote veur de wedsjtried un flinke hagel- en sjnee-buuj euver ’t veldj oet te sjtorte, wodoor dat d’r zo oet zoog:

foto21

De sjeidsrechter zoog zich genoodzaakt om de wedsjtried un kwarteer oet te sjtelle zodat de liene waer zichtbaar gemaak koosjte waere. Doanoa koosj esnog aafgetrap waere.

Vanwaege sjorsinge van Davy en Paolo en ’t wegvalle van Barney zoog de opsjtelling d’r es volgt oet:

Kis: Esat

Achter: Steve, Roel, Tim en de in de basis debuterende A-junior Sjoerd

Midden: Stan, Ricardo, Guido

Veur: Hassan, Marko en Thijs

Ut zou unne spectaculaire wedsjtried waere. Zeker de eesjte helf. Want al noa 5 minute pikte Thijs unne bal op ’t middenveldj op. Noa un 1-2 mit Marko besjloot Thijs op goal te sjeite. De keeper koosj de bal maar mit muijte hauf pareren en de bal rolde tergend langzaam richting doellien. De mitgeloupe Hassan goof de bal ’t letste zetje en brach De Sjter op veursjprong.

Daezelfde Hassan kreeg effe later de kans op verdubbeling van de veursjprong wie hae 1 op 1 richting keeper moch. Helaas woort die kans gemis. Aan de angere kantj woar ’t veur Geusselt Sport vlak doanoa waal raak. Unne korte corner woort gepromoveerd tot goal: 1-1.

Noa 25 minute sjpele woort Thijs getackeld door de keeper van Geusselt Sport en ging de bal op de sjtip. Ricardo benutte de pingel soeverein veur de 2-1. Vief minute later ging de bal auch aan de angere kantj op de sjtip en wis de Mesjtreichse ploug alwaer geliek te make: 2-2.

Doanoa twee kansen veur De Sjter. Eesj geef Thijs prima veur op Marko dae helaas net te hoog mikte. Maar vlak veur rus woar d’r esnog de veursjprong veur ozze jonges, via Stan. Maar doamit woar de rustsjtandj nog ummer neit bereik want ’t woar Geusselt Sport dat nog op 3-3 wis te komme. Mit dae sjtandj zochten beide plouge ’t kleidlokaal op.

In de tweede helft woar ’t eesjte opvallende moment de rooje kaart (twee keer gael in 2 minute) veur unne sjpeler van Geusselt Sport noa 60 minute. Doanoa kreeg De Sjter ’t baetere van ’t sjpel en auch de baetere kansen. Die woorte echter neit benut en ’t woar ’t teental van Geusselt Sport dat in de tachtigste minuut op veursjprong koom: 4-3. Vlak veur tied woort auch nog de trainer van Geusselt oet ’t veldj gesjtuurd veur aanhoudend gemekker op de leiding. De Sjter kreeg in de blessuretied nog unne vrieje trap. Dae woort de 16 ingepomp en belanjde op de kop van Hassan. Dae kupte de bal veur de goal, wo Ricardo ’t besjlissende zetje koosj gaeve veur de 4-4. In ’t tumult dat doanoa ontsjting woort nóg unne Mesjtreichse sjpeler oet ’t veldj gesjtuurd.

Veur ozze mannen zal de opluchting euver ’t behoalde punt euverheersen. De competitie is wiejer oetgesjpeeld. Degraderen kent neit meer en noacompetitie hoale auch neit. Dus geweun un kwestie van lekker mit leuk sjpel en ’n goeie sfeer oetvoetballen dit sezoen. Veur de supporters is d’r desondanks zeker alle reje om volgende waek de derby in Genhout en de waek doanoa thoes taege LHC, te komme bekieke. Ondanks ’n wisselvallig sezoen is os eesjte immers, noa terechte kampioen Sjaesberg, de meest scorende ploug en doamit jeder waek waal ’n garantie veur voldoende leuke acties en doelpunten.

De aafsjleiter kump dees waek in de vorm van ’n foto van de man dae qua blessureleed ’n pechsezoen haet, maar dae aafgeloupe vriedig desondanks unne top oavend houw bie ’t beerponge, the one and only Randy Wanten:

xx

 

Rob Sjulpe

 

 

De Ster Nieuwsbrief - Blijf op de hoogte!

grote clubactie steundester banner links

rksv de ster walking football 2018 1x250

ster webshop links 250

activiteitenoverzicht

Geen evenementen

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.