Wedstrijdverslagen

T begint ’n traditie te waere veur ozze hoofdmacht: winne taege LHC. Auch dit weekend kome de mannen waer mit de volle buit thoes oet Eygelse. Auch De Sjter 5 en de veteranen boekten waer ’n degelijke euverwinning. De angere seniorenteams leden helaas nipte of get minder nipte nederlagen. Erg gevarieerd dus allemaol. En toch is d’r dit weekend unne dudelijke rooie droad én unne man wo alles om dreijde dit weekend. De rooje droad is veteraan Gerard Martens, dae mit ziene kop op wurkelijk jeder foto sjting die ich de aafgeloupe waek toegesjtuurd kreeg. Noe kent dat auch te make hubbe gehad mit ’t feit dat al die foto’s ofwel bie De Paort ofwel bie Tilly van de Bekker zeen genomme. Maar toch…

En dé man van dit weekend? Dat is in de titel natuurlijk al verraoje. De oetlegk volg later in dit versjlaag. Euveriges, opnuuj dank veur alle toegezonje informatie. Ich hub d’r waal get in motte filtere, aangezeen d’r in te vaol hoeshouwes klachte kome van vrouw-lief, dat hunne man op maondigmurge meer es ’n hauf oer op de wc zit te laeze.

Veer beginne traditie-getroew waer mit de veterane. Die houwe doordewaeks nog unne jaorige te felicitere. En neit zo mer eine. Sjeidsrechter Math Haagmans bereikte de AOW-gerechtigde laeftied (ich ken d’r ’n jaor naeve zitte) en woort dan auch op de groepsapp door alle veterane gefeliciteerd. Naodat d’r 35 felicitatie-berichte langs waore gekomme en dus waer bergen goodwill gekweek waore bie Math, brook Gerard Martens dat in 3 seconde waer vakkundig aaf:

foto1

Dit weekend moosjte de veteranen aantraeje taege angstgegner Havantia. En aangezeen ’t de aafgeloupe waeke veurin aan échte creativiteit houw ontbraoke, waor jederein verheugd wie Willem Thewissen wis te melden dat Math Caanen terugk waor oet Thailand en waer koosj mitdoon. En dan kense ’t waal aan de in Belsj wonende Ron Marschall en Mesjtreichs cultuur-brenger Mat Creemers euverlaote om Math waerte verwelkomen bie de groep:

foto2

En dan kom veer toch waer terugk bie de rooje droad van dit versjlaag: Gerard Martens. Dae waor namelijk dees waek druk bezig mit de veurbereidingen op zien optraeje tiedes de playback aovend bie Tilly van de Bekker op zaoterdigaovend. Mede ras-arties Will Leurs sjonk os ’n topgeheime “behind the scenes” foto van Gerard dae de tekst oet de kop aan ’t lere waor:

foto3

Un foto die door coach Leon “Pep” Fredrix ens goud woort besjtudeerd en tot dees reactie leidde:

foto4

Euver de wedsjtried van de veterane vilt neit vaol te vertelle. Havantia bleek toch get minder angstgegner es verwacht. En dat terwiel de Sjter veterane d’r toch alles aan deige om hun eige ploug te verzjwake en die van Havantia te versjterke. Eesj woort bal-virtuoos Will Leurs aafgesjtange aan de mannen van Maes, omdat die unne man te weinig houwe. En vervolges blesseerde keeper Rene Hillen, veesj terugk van 2 waeke aafwezigheid, zich auch nog ens nao 5 minute en 5 seconde al, wodoor veur rus de boumlange Ron Marschall en nao rus de razende hamster Mat Creemers de goal moosjte verdedige.

Desondanks woort ’n grandioze 12-2 euverwinning veur de gael zjwarte vets. De goale kome op naam van Jacky Linders (3x), Stef Conjout (3x), Dennie Vorstermans (2x), Misha Dreessen (2x), Gerard Martens en Roger d’n Doam. Sjoonste goal koom op naam van (dao is de rooie draod waer) Gerard Martens, dae op zien “blue suede soccer-shoes” de bal subliem euver de keeper sjtifte. Euveriges moch de goal van Roger (sjprint vanaaf de middenlien, koelbloedig aafgemaak) d’r auch zeker zeen, zo hub ich mich laote vertelle.

Nao aafloup op de groepsapp woort oetgebreid versjlaag gedaon aan de sjriever van dit sjtuk, dae zelf neit koosj mitdoon. Thijs Otten vertelde euver de sjnelle blessure van Rene Hillen. Mer al sjnel daonao wo Rene (es veurzitter van de veteranen) effe lekker autoritair doon op de groepsapp. En dan besse bie Thijs Otten, dae zowel de “roaring twenties” es de “love and peace sixties” haet mitgemaak en dus ’n broertje dood haet aan autoritair gedraag, aan ’t verkeerde adres. Want Thijs dekselde Rene mit geliek mit ’n sublieme opmerking:

foto5Mit die opmerking gaon veer door nao de angere seniorenteams, te beginne mit De Sjter 5. Die houwe ’n druk programma, want op vriedig woort nog ’n oefenputje gesjpeeld (same mit sjpelers en sjpeelsters van De Sjter 3 en de Dames) taege ’n internationaal team van AZC Mesjtreich. Dat dae wedsjtried in ’n nederlaag eindigde, leidde echter neit tot teneergesjlage gezichte op zondig ochtend. De reje? “De beesten van 5” mochte veur de tweede keer dit sezoen thoes op ’t kunstgraas sjpele en de veurige keer houw dat 3 punte opgeleverd.

Effe ’n ziesjtepke… Euver dat kunstgraas is nogal get te doon bie de legere seniorenteams. Logischerwies wult jederein ’t leefste op kunstgraas sjpele, maar omdat 3, 4 en 5 vaak same thoes sjpele én nemes d’r ech werm veur lup om al om 9 oer te voetballe, is ’t lestig om jederein tevreje te sjtelle. Vriedig in de kantien woort de knoup doorgehak door Robert Kraus en woort bepaald dat ut driede en ut viefde op ’t kunstgraas mochte sjpele. ’N besjlissing die auch al sjnel doordrong tot Café de Bekker, wo De Sjter 4 vedette Rick “MC Rickert” Kostons ter plekke ’n hoogsjtaonde “gangsta-rap-line” euver aan ’t papier toevertroewde:

foto6

Robert, noe mosse neit kwaod waere, he. Zo wurd geweun gekald in die gangsta rappers-scene. Dat is aete of gegaete waere. Niks perseunlijks.

Maar goud, veer waore gebleve bie ut viefde. Dat moch dus op ’t kunstgraas aantraeje taege Limbricht 4. Nao ’n sjlechte serie woort ’t ens tied veur drie punten. En dus sjote de beesten van 5 oet de sjtartblokken. Al sjnel koom men op veursjprong via Ralph Janssen, dae ’n sublieme combinatie euver meerdere sjieve, doeltreffen aaf koosj ronje. Naodat de 1-1 waor geïncasseerd, woort de draod waer opgepak en door prima doorzette van Serge Grobbé koom de 2-1 op de borden.

Nao de rus waore de mannen van 5 echter 10 minute neit bie de les en in die periode boog Limbricht de 2-1 achtersjtandj om in unne 2-4 veursjprong. Die score bleef tot de 75e minuut sjtaon. Maar toen brook ’t Sjteins kwarteerke aan. De aansjleitingstreffer koom van Thijs Kemp en vlak daonao kupte Mike Schippers oet unne corner zelfs de 4-4 in. En daomit waor de kook nog neit op. Want 5 minute veur tied maakte Robin Janssen de winnende goal: 5-4.

Unne geweldigde wedsjtried en auch ’n schitterend aafsjeid veur Lars. Dae geit namelik backpacken in Nieuw Zeeland tot 1 maart. Euveriges houwe zien ploeggenoten al op zaoterdigaovend bie dat aafsjeids sjtilgesjtange in de vorm van ’n beerpong-toernooi bie Lars thoes:

foto7

Proficiat mannen van 5 mit de 3 punte! De waeg omhoog is ingezat.

Dan door nao de zoepnaze van De Sjter 4. Die houwe dit weekend auch al ’n mega druk programma. Mit ’n hoofdrol veur “dé man van dit weekend” Rick Kostons. Want Rick waor op zondig jaorig en vierde dat op vriedigaovend mit zien ploeggenoten bie Tilly van de Bekker. En geer wit wie Rick is: nao vief glaze beer hing ‘r al in de hoak aan ’t plafond:

Zeventeen pils later sjloog de vermuijdheid dan toch toe bie de jaorige job. Maar wo menig angere dan nao hoes zou gaon en zich in bed zouw legke, dao toont Rick op die lestige momenten sjus aan dat hae unne échte teamplayer is. Get wat zien ploeggenoten vanaaf 12 oer jeder houf oer op de foto hubbe vasgelag:

Maar mit ein zo’n zjwaore nach, zoot ut weekend d’r nog neit op veur Rick en de res van De Sjter 4. Want op zaoterdigaovend goof vanzelfsjpraekend waer ’n grote delegatie acte de presence bie de Playback-show bie Tilly van de Bekker. Mit Rick, vanzelfsjpraekend, es sjtraolend middelpunt:

foto10

Dae aovend onthulde Rick trouwes nog tiedes un gesjprek mit Noud Claessend de reje van zien in sjlaop valle de veurige nach.

Noud: “Auw muk, Rick, doe hubs gister geweun ligke pitte hie.”

Rick: “Dat kump door dat vruige opsjtaon doordewaeks. Dan ben ich ’s aoves kapot.”

Noud: “Denkse neit dat die 25 pils d’r auch get mit te make hubbe?”

Op dae playback aovend sjitterden trouwes, names de veteranen neit allein Gerard Martens maar auch Dennie Vorstermans (es ein of angere Sjpaanse artiest) en Will Leurs (es Phantom of the Opera).

foto11

Nao twee sjlopende sjtap-aovende moosjte de mannen van De Sjter 4 op zondig aan de bank taege RKUVC 3. En dat auch nog zonger ’n aantal sjterkhouwers die in Amsterdam op ein of angere gabber-party waore. En dus moosj noodgedwonge ’n beroep waere gedaon op ’n tweetal veteranen, in de persone van de sjrieve van dit sjtuk (dae dit weekend nog neit gevoetbald houw) en Stef Conjour (dae dit weekend waal al gevoetbald houw, maar aangoof geweun gaer van hoes te zeen).

Bie entree in ’t kleidlokaal sjloog de sjriever van dit sjtuk de sjrik om ’t hart. Want Rick houw ’n gigantische meziek-box in ’t kleidlokaal neergezat.

Rob: “Ben ich godverdomme bie 1 gesjtop omdat ze mit dae k*t meziek in ’t kleidlokaal ginge beginne, en noe krieg ich dít…”

Maar gelukkig waor d’r niks mis mit de mezieksjmaak van de jonges van ut veerde: van MC Hammer’s “Can’t Touch This” tot Blackstreet’s “No diggity” tot de Rolling Stones oetveuring van Bob Dylan’s wereldhit (oet de gloriejaore van Thijs Otten) “Like a rolling stone”. Allein mer goeie meziek.

Wie “Zombie” van The Cranberries veurbie koom, moosj auch hobby DJ Stef Conjour taegeneuver professioneel DJ Stan “The Man” Ortmans bekenne dat de meziek prima waor.

Stef: “Is dat dien playlist, Stan?”

Stan (verwiezend nao de neit geheel frisje indruk dae Rick Kostons maakte): “Nae die van Rick. Dit leidje besjrif wie hae zich momenteel vuilt.”

Jederein kleijde zich op zien gemaak om. Allein Pedro Willems bleef geweun zjwiegend in de deur aopening sjtaon. Dat veel auch Stef op.

Stef: “Pedro, en dich? Allein de tweede helf?”

Pedro: “Nae, allein de derde.”

Patrick Nordhausen maakte de opsjtelling vervolges bekend. En dat is ’n sjoon gelegenheid om de coryfeeën van ut veerde ens aan uch veur te sjtelle.

In de goal de man dae bie de veteranen (wo hae drie keer haet oetgeholpe) inmiddels is oetgegruijd tot “living legend”: Peter Paes alias “De lange Paes”.

Rechtsback Stan “The Man” Ortmans, dae doordewaeks nog de aanbieding van ut viefde houw aafgesjlage en lekker op 4 blif ballen.

Linksback Danny Pepels. Ich houw ‘m nog nooit zeen voetballe. Maar nao vandaag kent De Sjter 1-sjpeler Wesley Thompson ziene ere-titel aafsjtaon. Danny Pepels is namelijk ech Un Machine!

Centraal achterin, mit per persoon 8 promille in ’t bloud, sjpeelden Noudje Claessens en Kenny Lemmens. De ein aansjtaond wethouwer in Sjtein, de anger aansjtaond Neerlands eesjte drie-sjterre generaal.

Op ’t middenveld op rechs Johnny Pantus… Ich dach dat Hassan Benabdellouahab sjnel waor, mer ich mot ut nog ens zeen es ’r ut taege John mot opnumme.

Linkshauf de man zonger tekortkomminge (behalve dan dat zien kinjer bie Haslou sjpele): Oscar Nieskens. Oscar leet vandaag blieke dat de liefde veur Haslou bie heum waal deip zit want hae sjpeelde ’n aantal kere de bal bewust nao unne sjpeler van ut in wit-zjwart sjpelende RKUVC.

Tusje Johnny en Oscar in sjpeelden de sjriever van dit sjtuk én de captain van de zoepnaze Patrick Nordhausen. Veur Patrick niks dan lof. Wae al jaorelangk mit zo’n sjtel (naeve ’t veldj) ongeleide projectielen oet de vuit kump, verdeint ’n compliment.

In de veurhoede naeve veteraan Stef Conjour, sjting kilomaetervraeter Michel Beks: technisch, sjnel, naeske veur de goal en auch nog keihel wirke in deins van de ploug.

En dan te bedenke dat coach Nordhausen nao de rus auch nog Rick Kostons en Pascal Conjour koosj inbrenge. Rick is unne degelijke mandekker wo geine taegesjtenjer gaer taege sjpeelt. En Pascal.. tja, dat is natuurlijk ein van de technisch meist begaafde sjpelers die de club ooit haet veurtgebrach.

Mit die ploug moosj men ’t, onger leiding van sjeidsrechter Tom Keulen, opnumme taege RKUVC dat 6 plaatsje hoger op de ranglies sjting. Helaas neit op ‘t kunstgraas maar op de prachtige natuurgraas-wie van veldj 2. ’N Psychologisch naodeil. Die van RKUVC waore natuurlijk niks angesj gewend, terwiel ut veerde van De Sjter toch eigenlijk ’n ploug haet die ’t veural mot hubbe van vloeiend combinatiesjpel op de veerkantje maeter.

Desondanks waor d’r vandaag maar 1 ploug die voetbalde en dat waore de zoepnaze van 4. En dat leidde nao ’n kwarteier auch tot de 1-0 door Stef Conjour, dae zich knap vrie sjpeelde en verwoestend oethaolde. De veursjprong doerde echter neit lang want ’n onachtzaamheid bie de zoepnaze woort aafgesjtraof en zo sjting ’t waer 1-1.

De Sjter bleef lekker voetballe en dat leidde dan auch waer tot unne verdeinde veursjprong. Rob veroverde unne bal, goof ‘m deip op Stef, dae beheerst ziene tweede van de ochtend maakde. Helaas wis RKUVC oet unne corner nog veur rus de 2-2 taege te prikken.

Gedurende de eesjte helf houw Rick Kostons ’t druk gehad langs de lien. Hae houw bienao gein minuut op zien vot in de dug out gezaete. Eesj rende hae inens, om onverklaorbare rejene mit de waterzak ’t veldj in. Effe later ging hae zich sjpontaan werm loupe. En twee minute veur rus sjprong hae op en zei: “Ich gaon al nao binne, ich mot zeike wie unne reiger.”

Wie Danny Pepels, es eesjte basissjpeler in de rus ’t kleidlokaal binne komme, trof hae dao Rick aan dae in de douche sjting te pisse.

Danny: “Rick mannuh, worom deisse dat in de douche, gek?!

Rick: “Ja, ich moosj geweun heel neudig.”

Danny: “De WC is twee maeter naeve dich, mannuh!”

De tweede helf koom ut veerde aanvankelijk get minder in hun sjpel en dat leidde, nao waer unne corner, tot de 2-3 achtersjtandj. Dae sjtandj bleef angstvallig lang op ’t scorebord sjtaon. Totdat Stef unne corner forceerde, dae genomme ging waere door John Pantus. John, trok de bal sjtrak richting “punt vief”, wo Rob naotoe waor geloupe en de bal sjnoei-hel in de krusing van de korte houk kupte: 3-3.

Ut veerde bleef probere de winnende treffer te forceren, maar kreeg helaas in de allerletste seconde ’t deksel op de naas toen RKUVC via unne counter de 3-4 aanteikende. Nao aafloup woort d’r in ’t kleidlokaal 35 seconde gebaald. Dat waor de tied dae Kenny neudig houw om de box van Rick aan te sjleite op zien tillefoon. De bassen deige ’t Hetje trille, Rob koom mit ’n deinblaad pils binne, en alles waor alwaer vergaete.

Stef probeerde later in de kantine nog effe mit Patrick euver ’t voetballe te kalle, maar dat woort door Kenny mit 1 relativerende opmerking geliek platgehouwe.

Stef: “Veer make zelf de fouten achterin. Ze kriege de goale geweun cadeau.”

Patrick: “Zo geit dat jeder waek, Stef.”

Stef: “En doe accepteers dat geweun?”

Kenny: “Hae haet weinig keus, he.”

Noudje meldde vervolges dat hae neit vaol ging drinke vandaag.

Noud: “Ich mot murge wirke namelijk.”

Patrick: “Esse dich dao net zo inzets es bie os, kense dich baeter krank melje.“

En toen waor ut tied veur ut grote moment. Want ich hub al heel get waeke zoepfoto’s van ut veerde geplaatsj en d’r euver gesjreve, maar esse dan eindelijk zelf op zo’n foto maogs figureren… dan is dat toch effe sjlikke:

foto12

Mannen van 4, geer hub éch unne sjieke groep. Ut waor leuk om vandaag mit uch te voetballe!

Daomit zeen veer aangekomme bie De Sjter 3. Dat houw vandaag unne pittige taegesjtenjer in Eijsden 4. ’T zoog d’r eigenlijk de ganse waek haer oet dat d’r geine input van 3 ging komme, want de eine correspondent (Rene Gooren) waor appelesiene aan ’t zuike in Sjpanje en de angere correspondent (Mark Habets) moosj thoes mit de kinjer Sinterklaos-cadeau’s oetpakke. Gelukkig veur uch allemaol, wolle Marks oudste kinjer, River en Mirre, tóch nao ’t voetballe gaon kieke.

Aangekomme op ’t Hetjen, waor de wedsjtried van 3 al aan de gang op ’t kunstgraas. Mark koom eesj Robert Kraus taege. Mark: “Dae lachte esof hae de loaterie gewonne houw. Mer wat bleek, ut viefde houw gewonne. Dat waor dus de eesjte wedsjtried van un Sjter-team wat haet gewonne es dae sjlumme flut.”

Wie Mark zitting noom in de dug out kreeg hae te heure dat zien ploug al mit 0-3 achter sjting. Aan de opsjtelling loog ’t echter geinszins, volges Mark: “De einige wissel dae veer houwe, zoot naeve mich op de bank bienao te sjpieje… Dus vaol keus houwe veer neit vandaag.”

Nog veur de rus koom ’t te sjterke Eijsden op 0-4 en vlak nao rus zelfs op 0-5. ’T waor Raoul “kappe en dreije” Dassen dae mit de kop de 1-5 op de borden brach. Zou ’t dan toch nog?... Maar nae, vief minute later sjting ’t alwaer 1-6. Ralph “Gladiator” Doek maakte nog de 2-6 oet unne penalty, maar helaas houwe de reserve-sjenge ’t letste woord. Eindsjtandj: 2-7.

Lichtpuntje bie De Sjter 3 vandaag waor Mark Caubo. Neit in ’t veldj, he. Want sliding-specialist Caubo is de einige sjpeler binne de vereiniging dae baalt van ’t kunstgraas. Maar in de kantien nao aafloup maakde Mark zich onsjterfelijk door wurkelijk van jeder anger aanwezig team (inclusief de gasten van RKUVC en Eijsden) ’n rundje veur ut driede te versere. Names De Sjter 4 goof Patrick Nordhausen, nooit de beroerdste, Mark geliek ziene zin. En zelfs hoofdtrainer Czornyj goof un rundje. En dat terwiel hae neit ens aanwezig waor in de kantien, maar op ’t veldj in Eygelse sjting! Althans… ich weit neit ofse éch van “un rundje gaeve” kens sjpraeke esse bie Jo van Funs 12 pils besjtels en zaes “zet maar bie de hoofdtrainer op de raekening.”

Dan sjnel euver nao de beloften van De Sjter 2. In de toch al neit malse reserve hoofdklasse houwe die vandaag de oetwedsjtried taege koplouper Gemert 2 op ’t programma sjtaon. Vruig mit de bus vertrekke dus veur ozze mannen. En dan auch nog mit ’n door blessures oetgedunde selectie, wodoor maar leifs 5 A jeugdsjpelers mit moosjte. In de bus zurgde Tim Peerlings veur sjpas door op de vraog waorom hae ziene 8-jaorige voetbalgekke zoon Devin neit houw mitgenomme, te antjwoorden: “Auw shit, noe se ’t zaes. Dae wol mitgaon. Hae zoot achter de Play Station wie ich ging en ich ben ‘m in alle haos vergaete…”

Jari Knoops raekende in de bus de gemiddelde laeftied van de ploug van vandaag oet:

foto13

Mit die piepjonge ploug leverde De Sjter 2 vandaag un prima partie aaf. Gemert waor de baetere ploug en waor bovendien ultra-effectief. Want de eesjte de beste kans, nao 10 minute, deig geliek ’t netje bollen. Nao get sjpelden-prikskes van De Sjter, waor ’t Gemert dat de score verdubbelde. Oet de kluts koom de bal bie de linksboete dae koelbloedig raak sjoot. Vlak veur rus waor ’t Luc Spaans dae a la Bep Bakhuis (veur de jongere laezers: mit unne snoekduuk) bienao de 2-1 scoorde. De Gemert keeper veurkoom dat echter mit un prima redding.

Nao de rus koom Gemert al heel sjnel op 3-0 en leek de wedsjtried gesjpeeld. De Sjter scoorde echter auch al heel sjnel taege. Luc Spaans ving de bal op nao unne corner en lag ‘m aaf op Cyril Bruinen, dae op zien beurt Steve Krijgsman zoog vriesjtaon. Steve scoorde beheerst de 3-1. Ut sjlotakkoord waor echter veur Gemert dat 4-1 aanteikende. Daonao mochten A-junioren Mathon van de Woude en Niek Savelkoul nog hun debuut bie 2 make ’t letste kwarteier. Aan de score verangerde niks meer.

Weliswaar woort dus verlaore van de koplouper, maar de 4-1 waor absoluut gein sjanj. Os tweede waerde zich kranig taege unne iezersjterke taegesjtenjer.

Nao aafloup in de bus zurgde de mitgereisde pap van Bob Dukers, Raymond, veur get opsjudding. Hauverwaege de reis meljde hae zich achter in de bus.

Pap van Bob: “Jonges, mot de bus nog sjtoppe bie de MC Donalds?”

Youri: “Wat zaet hae?”

Jari: “Hae vreug of de bus mot sjtoppe bie de MC Donalds.”

Youri: “Haet de buschauffeur de bus op automatische piloot sjtaon of wat?”

Jari: “Wo sjleit dat op?”

Youri: “Ja, hae sjteit toch hie!”

Jari: “Dat is de pap van Bob, kuuke, neit de chauffeur!”

Euveriges (en ich wul absoluut neit sjteuke in ’n goud huwelijk) hub ich oet betroewbare bron begrepe dat Raymond Dukers mit de bus is mitgegange vandaag omdat zien vrouw Anita per se de keesjboum wol opzette vandaag.

Tot sjlot dan nog os vlaggesjip. Dat moosj vandaag oet taege ein van de topplouge oet 2G: LHC oet Eygelse. Op papier zjwaor, maar eigenlijk al jaore ’n ploug die De Sjter goud ligk. LHC is ummer 4 of 6 puntjes veur ozze mannen. En dat zurgde veur de wedsjtried dan auch veur ’n prima sfeer in ’t kleidlokaal. Randy Wanten sjmeet op enig moment per ongeluk ’n plastic flesjke taege de kop van Piet Vos. Randy lachte effe maar bedach zich toen dat dat neit zo sjlum waor, trok unne sjprint nao de WC, deig ’t deurke op sjlaot en koom d’r pas vanaaf wie hae boete de sjeidsrechter heurde fluite.

Roel Heffels waor zich intusje de pupsje oet de auge aan ’t wrieve. Dae houw ’t vriedig namelik waer laat gemaak in ut café, wo hae flink sjans houw, zo bliek oet dees foto (wo, dao is hae waer, auch Gerard Martens waer mit ziene kop opsjteit):

foto14

De opsjtelling waor ’t zelfde es veurige waek. Keeper Esat waor gelukkig fit genog om te sjpele en sjtartte in de goal. Euverig kump dat fit make van Esat volledig op ’t conto van Michel Somers. Dae is toch weg nao Roda? heur ich uch denke. Dat klop auch. Maar Michel is geweun zonne fantastische gast dae kump oethelpe omdat verzurgder Wesly pas aan ziene pols is geopereerd. En dus waor Michel vanmurge in alle vruigte al op ’t Hetjen (in clubkostuum van Roda, omdat hae in eine waeg door moosj nao Krikrao) om Esat op te lappen:

foto15

Michel, doe bes ech helemaol geweldig!

Wiejer sjpeelde De Sjter mit Roel, Paolo, Davy en Stan in de achterhoede. ’T Middenveldj woort bemand door Guido, Ikram en Ricardo. En in de veurhoede acteerden Hassan, Marko en Thijs.

De ploug begoosj vandaag zjwaak aan de wedsjtried. De aopeningsfase waor dudelijk veur LHC. Die ploug koom auch nao 12 minute op veursjprong via unne kupbal. En effe daonao kome de gael-zjwarte mit de sjrik vriej wie unne bal van LHC op de lat belanjde.

In de 35e minuut eindelijk unne prima aanval van os eesjte. Thijs koom d’r op links langs, goof unne prima veurzet dae door Guido knap woort binnegekup. HOPPPAAAA 1-1!

En vlak veur rus woort ’t nog sjoner. Thijs waor attent op unne lestige terugksjpeelbal, koom d’r tusje en scoorde de 1-2!!!!!!

In de tweede helf waore beide plouge aeve sjterk. Un kwarteier veur tied kreeg unne verdediger van LHC nog de rooi kaart naodat hae de bal op ziene erm houw gekrege. De vrieje trap dae dao oet veurtkoom woort door Ikram prachtig ingesjote maar door de LHC keeper aeve prachtig gered. In de 80e minuut koom Thijs nog unne keer 1 op 1 veur de keeper, dae opnuuj redde. Daonao gein kansen meer veur beide plouge en dus trok De Sjter 1 de zege euver de sjtreep en koosj men opnuuj vertrekke mit 3 punte oet Eygelse. Op de ranglies bezet de ploug noe de 4e plaatsj, achter Schaesberg, Venlosche Boys en LHC.

En zo woort ’t geweldig weekend aafgesjlaote mit ’n prima euverwinning van De Sjter 1. Intusje in de kantine in Sjtein, woort ’t sjpannend welk team de derde helf ging winne. Die van Eijsden en RKUVC houwe ’t al opgegaeve. De Sjter 3 vertrok auch wie d’r gein teams meer euver waore veur Mark Caubo om gratis rundjes bie te regele. ’T koom dus aan op unne tweesjtried tusje de ervaren zoepnaze van ut veerde en de baco-boys van De Sjter 2. En de winnaar van de derde helf is gewore……

Tromgeroffel…..

Oeh sjpannend…..

Zeet geer d’r klaor veur? ….

Dan kiek maar zelf:

foto16

Proficiat mannen van 2. Gein punten, mer waal ’t leich oetdoon in de kantine. Grote klasse!

Rob Sjulpe

 

Bestel de clubhanddoek

klik op de banner
club handoek 2020 banner

rksv de ster walking football 2018 1x250

ster webshop links 250

blessurehulp left banner

De Ster Nieuwsbrief - Blijf op de hoogte!

Deze website maakt gebruik van cookies om voorkeursinstellingen bij te houden en analytische cookies om de website te optimaliseren.