Wedstrijdverslagen

D’r zeen van die zondige… Wae allein al nao de resultaten van deze zondig kik, zal al sjnel unne grote gemeine deiler herkenne. ’T raegende nederlagen veur de seniorenteams. Un 1-4 nederlaag veur De Sjter 1. De beloften ginge mit 1-5 de boot in. Ut driede verloor mit 5-0, ut veierde mit 6-0 en ut viefde mit 1-4. En bie jeder versjlaag van de reporters ter plekke vele de weurt ‘complete off-day’. 2e elftal-sjpeler Jari Knoops vatte de zondig nog ’t beste samen door te zegke: “Ich hub gistere bie de B1 motte vlagge, oet bie EHC. Op ’t veldj daonaeve zoog ich dat ’t G-team van EHC unne wedsjtried sjpeelde. Die haolden ’n baeter niveau dan alle senioren-teams van De Sjter biejein vandaag.”

Bie zoveul elenj is d’r maar ein remedie: blieve lache. Daorom in dit versjlaag zo weinig muigelijk euver ’t voetballe en zo vaol muigelijk flauwekul oet de kantien, de café’s en de kleidlokale.

Maar veurdat veer nao de wedsjtrieje euvergaon eesj effe aandach veur ein van ozze besjtuursleden, dae de aafgeloupe waek geïnterviewd woort op L1. Tom vertelde dao heel sjoon euver de werknummers van ’t bedrief wo hae de scepter zjwejt, Emma Shoes. Opvallender waor echter ’t door L1 gebroekte ongersjrif bie ziene naam, wo oet bliek dat Tom’s reputatie inmiddels provinciale bekendheid geneit:

foto1

 

Op voetbalgebied beginne veer auch dees waek waer mit de veteranen, die op zaoterdig de aaftrap gove veur dit voetbalweekend. In de aanloup nao de wedsjtried taege de vets van RKUVC gebeurde d’r niks ongebroekelijks. Robbie van der Linden dronk zich ’n hauf oer veur de wedsjtried nog drie pilskes, Stef Conjour zoot op dat moment al omgekleid in ’t kleidlokaal te trappele van ongeduldj en Mischa Dreessen koom 5 minute veur de aaftrap binneloupe. Bussiness as usual dus.

In ’t kleidlokaal waor ’t eesjte gesjpreksongerwerp sjnel gevonje. Dennie Vorstermans houw namelijk op zaoterdigmiddig unne mail gesjtuurd nao zien teamgenoten mit dao in ’t oetneudiging veur ’n speciale trainingsactiviteit:

foto2

En Dennie leet zich sowieso al neit onbetuug es ’t geit om ideeje veur activiteiten van de veterane. Zo koom hae ongerhauf waek geleje nog mit ’n alternatief veur de door Mat Cremers veurgesjtelde “Wiks-clinic”:

foto3

Wiejer waor d’r veur de wedsjtried waer ’t neudige te doon euver de sjoonkeuze van sommige veteranen. Want wo Eddy Ubbink unne maondj geleje nog rondjleep op sjlange-laere instappers, waor ’t dit keer stijl-icoon Mat Cremers dae op instappers mit panter-print door ’t kleidlokaal paradeerde.

Mer auch euver de voetbalsjoon van Gerard Martens waor unne houp te doon. Gerard waor namelijk eindelijk versjtenjig gewore en houw zien blauwe paar ingeruuld veur ’n ouwerwets zjwart paar. Dat houw hae doordewaeks al mit ’n foto op de groeps-app aangekondigd, in de haop natuurlijk dat hae dao get complimente veur zouw kriege. Dat veel echter taege in de praktijk, want om Gerard te plaoge woort alles op die foto becommentarieerd behalve de sjoon:

foto4

In ’t kleidlokaal mirkde Gerard op dat d’r nog mer eine sjpeler waor mit get kleur in de sjoon.

Gerard: “Allein Will Leurs haet nog sjiek gekleurde sjoon.”

Willem: “Jao, mer dae haet auch al heel get sjieke goale mit die sjoon gemaak.”

Will: “Jao, dao zit get speciaal in, in dees sjoon.”

Willem (Will van top tot teen bekiekend): “Dat kense waal zegke dat d’r get speciaals in zit.”

Mat Cremers koom vervolges nog aanzette mit unne grote pot zjwarte proeme en euverhandigde dem aan Jack Linders:

Mat: “Hie Jack, dae is veur Finy.”

Jack: “Wat zeen dat dan?”

Mat: “Zjwarte proeme. Un witte proem houw ze al, zei ze.”

Daomit waor ’t tied gewaore veur de warming up. Reserves Willem Thewissen en Thijs Otten besjproke of ze zich toch neit auch effe zouwe gaon opwerme.

Willem: “Thijs, zulle veer op ’t graasveldj effe get kort werk doon?”

Thijs: “Vanaovend bie de vrouw doon ich nog effe get kort werk. Ich blief lekker werm binne noe.”

Euver de wedsjtried taege RKUVC kenne veer wiejer kort zeen. Dat woort ein grote gala-veursjtelling. Gerard Martens sjpeelde achterin, op zien zjwarte sjoon, eindelijk ens ’n acceptabele partie. Jack Linders waor veurin sjerp wie ummer. Peter “de lange” Paes waor neit te passeren in de goal. En de 65-jarige super-sub Will Leurs leet nao de rus zeen wat hae al unne hauve eeuw leet zeen. Of, zo wie Willem Thewissen dat verwoordt: “Op Will zit totaal geine sjleet. Dae haolt noe nog precies ’t zelfde niveau es 35 jaor geleje.”

Maar, zonger emes te kort te wulle doon, de grootste sjter op ’t veldj waor toch waal Stef Conjour. Want mit 4 assists, eine assist op de assist en ’n wereldgoal vanaaf de zielien, ter hoogte van de middenlien euver de keeper, waor Stef de grote man. Die goal waor ech schitterend. Maar ’t zaet genog euver de kwaliteiten van dit team es ’t neit ens de sjoonste goal van ’t sezoen waor. Die sjteit namelijk nog ummer op naam van Will Leurs, dae taege OVCS eerder dit sezoen, de bal mit boetekentje links heel bekeken euver 25 maeter in de krusing lifte.

Via goals van Robbie van der Linden, Jack Linders, Rob Schulpen (2x), Stef Conjour en Mischa Dreessen woort de eindsjtandj bepaald op 6-0. En dat zonger geblesseerde coryfeeën wie Math Caanen, René Hillen, Robert Lucassen en Ron Marschall. Dae letste houw onger de wedsjtried langs de kantj veur get verbaal amusement gezurg. Zo knuipde hae ’n gesjprekske aan mit unne 14-jaorige jong dae sjting te kieke.

Ron: “En jong, veur wae kumps doe kieke?”

Jong: “Veur Willem. Ich hub ‘m gevraog of hae miene trainer wult waere.”

Ron: “Ich ben bang dat ‘r dat neit meer maog.”

Jong: “Neit maog?”

Ron: “Jao, hae haet d’r ’n paar jaor veur vas gezaete. Get mit kinjerporno of zo.”

Wiejer waor Ron erg tevreje euver zien opmerking nao de invalbeurt van Will Leurs.

Ron: “Toen zei ich: hehe, eindelijk hubbe veer noe de Will om te winne op ’t veldj.”

Leon: “Jao Ron, dat hubse noe al drie kere gezag wo Rob bie is. Ich denk dat ‘r ‘m zich intusje waal al haet opgesjreve veur ’t verjlaag.”

Ron: “Ja, ich vonj ‘m geweun heel leuk verzonne. Ich moosj d’r zelf om lache, zo leuk.”

Will Leurs kalde ongertusje nog effe nao mit Willem Thewissen euver de wedsjtried.

Will: “Willem, veel dich auch op dat dae taegesjtenjer van mich jedes keer verkeerd sjting te dekke?”

Willem: “Houwse dao dan neit unne keer gebroek van kenne make?”

Naodat Stefan Janssen de knien houw gewonne mit dobbele, ging om 7 oer de kantine toe, in verbandj mit de revue (wo veteraan Eddy Ubbink trouwes in sjitterde). Letste wapenfeit in de kantine koom op naam van coach Leon “Pep” Fredrix, dae Will Leurs holp om get problemen mit de tillefoon op te lossen en ‘en passant’ de profielfoto van Will op Whatt’s app verving veur die van ’n naaksj vrouwmusj.

Vervolges woorte d’r nog ’n paar gezellige uurkes doorgebrach bie Café de Paort. Dao probeerde Willem Thewissen geliek al Pedro van de Paort oet de tent te lokke.

Willem: “Pedro, deisse nog waal ens zinge?”

Pedro: “Jao, af en toe, Willem.”

Willem: “Hie, Robbie Schulpen haet dich nog nooit heure zinge. Laot ens get heure.”

Pedro: “Ich wul ‘m gaer nog effe hie haute. Ich gaon neit de klandizie nao boete jage.”

Naodat grensrechter Willie “de Worm” nog zien vlekkeloos ongerboewde visie op ’t Sjteinse vluchtelingebeleid en de investering in ’t nuujt zjwumbad mit jederein houw gedeild, woort d’r nog gebroederlijk mitgezonge mit “Suspicious minds” van Elvis. En daonao woort de keeperspositie bie de veteranen besjpraoke. Geconstateerd woort dat Rene Hillen ’n vaste waarde is, Marcel Frissen helaas nog in de lappemandj zit en Peter Paes unne geweldige stand-in is. Maar Willem houw nog opgevange dat zich nóg ’n optie houw aangedeind.

Willem: “Ich hub geheurd dat Rudy Crutzen auch haet aangegaeve dat ‘r bie os wult keepen.“

Ron: “Rudy? Wult dae auch van de vrouw aaf?”

En zo ging ’t nog tot in de late uurkes door. Pas wie Gerard Martens get al te sjerp begoosj te dansen, hele de meeste veteranen ’t veur gezeen.

Dan euver nao de zondig. De Sjter 5 verloor kansloos mit 1-4 van Urmondia 3. Dae wedsjtried sjting in ’t teiken van ‘t aafsjeid van Tom Kluitenberg dae kommende gounsdig nao Australië emigreert. Volges Mike Schippers haet hae dao ’n lucratief contract geteikend bie ‘n Korfbal-team oet Gold Coast. En wát veur ’n aafsjeid woort ‘t! Want oetgeraekend Tom scoorde ’t einige doelpunt veur ‘De Beesten van 5’. Names gans De Sjter wunsje veer Tom proficiat mit zien goal en vaol plezeier in Down Under.

De Sjter 4 moosj aantraeje taege GSV’28 3. De veurteikene waore al neit geweldig. Want al de ganse waek waore d’r hardnekkige geruchten euver unne op hanje zeende transfer van zoepnaze-vedette Stan “The Man” Ortmans. Die geruchten woorte allein mer sjterker wie de volgende foto op facebook woort geplaatsj en binne ‘no time’ viral ging:

foto5

Kenny Lemmens zoch beteuterd contac mit de sjriever van dit versjlaag. Dae probeerde Kenny d’r van te euvertuge om dit zakelijk te bekieke:

foto6

De onzekerheid euver de toekomst van Stan wirkde verlammend op de sjpelers van ut veerde. Alle 14 besjikbare sjpelers waore vandaag, volges Kenny, aeve sjlech. Auch teikenend waor dat coach Patrick Nordhausen versjtek moosj laote gaon bie de derde helf. Gelukkig houw dit niks mit teleursjtelling euver ’t resultaat te make, mer waor ’t geweun ’n kwestie van koppien naodat mascotte Truus (van Pedro) ‘m gistere onger de kar gezoape houw.

De einige dae in de derde helf opnuuj oetblonk waor de man mit de eeuwige glimlach, Rick Kostons. Dae haet de ganse wedsjtried van 1 langs de kantj gesjtange maar helemaol niks van ’t voetballe mitgekrege omdat hae ’t te druk houw mit ’t sjanse mit de mam van ein van de sjpelers van Venlosche Boys. Klasse Rick!

Gelukkig houw Rich waal nog effe tied om de poseren veur de gebroekelijke zoep-foto van ut veerde. Op die foto herkent geer trouwes linksonger in ’t huikske nog unne hauve haan van De Sjter 2.

foto7

Dan De Sjter 3. Dat vertrok vanmurge vol goeie mood richting koplouper Sjummert 2. Die goeie mood houw volges Rene Gooren te make mit de 2e plaatsj in de periodesjtandj:

foto8

In de grandioze “engelsj aandoonde” voetbaltempel van Sjummert sjpeelde os driede ’n sjterke eesjte helf. Beide plouge krege get kenskes maar gescoord woort d’r neit. Auch neit door Robin Heijnen dae vandaag es linksback acteerde en ’n goeie kans op de 0-1 kreeg. Nao de rus waor Sjummert de baetere partie, kreeg auch get hulp van de sjeids en toen waor de wedsjtried sjnel gesjpeeld. Oeteindelijk bleef de teller sjtaeke op 5-0. Hoogtepunt van de wedsjtried deig zich veur wie Robin Heijnen geblesseerd op ’t veldj loog en effe verzurging neudig houw. Coach Mark Habets koom mit ziene poot in ’t gips mit de waterzak ’t veldj in. Mit dae gipse poot ging dat natuurlijk tergend langzaam, wo op Marks sjoonbroor Bjorn van den Bergh reep: “Loup ens get door, muige!” De sjeidsrechter leet dao op zeen dat hae op de sjeidsrechters-opleiding ’t keuzevak “omgaon mit humor tusje ploeggenoten” neit gevolg houw en dreigde Bjorn gael te gaeve es hae ziene mondj neit heel. Auch Jos Ostendorf kreeg op ’t lets nog bienao rood omdat hae gein aafsjtandj wol numme bie unne vrieje trap. Ondanks toejuichingen van de angere sjpelers van 3 heel de sjeids die kaart echter op zak.

De Sjter 2 houw unne complete off day taege Nulandia 2 en verloor mit 1-5. Jari Knoops houw neit meer te melden, dan dat ’t “geweun éch dramatisch waor.” Oethuule en kommende waek opnuuj probere dus. Get angesj zit d’r neit op veur ozze beloften.

De dames houwe vandaag wederom geine wedsjtried en koosjte dus auch gein puntjes sjprokkele veur ozze seniorenteams.

Tot sjlot dan nog De Sjter 1. Reporter van deins vandaag waor de helaas nog ummer geblesseerde Randy “Milfhunter” Wanten. Doordewaeks woort in jeder geval al dudelijk dat Randy zien gevuil veur humor nog ummer haet. Zo sjtuurde hae triomfantelijk ’n bericht door dat hae gelaeze houw op de facebook-pagina van BNN-programma Spuiten en Slikken. In dat bericht woort eindelijk aan os mansluuj oetgelach waorom “big-nose” Randy Wanten zo’n ontieglijke aantrekkingskrach op de Sjteinder dames haet. Die wiste dit immers waarsjienlijk al lang.

foto9

N geluk veur vriegezel Randy dat de einige man in Sjtein dae ‘m op dit gebied de loef zouw kenne aafsjtaeke, al 40 jaor gelukkig getrouwd is…

Wiezo wae? Jean Fredrix natuurlijk!

Wiejer houw Randy doordewaeks nog get sjpas gehad door ziene bezurgdheid uitende brouer Wesly te plaoge. Dae leet dudelijk blieke dao neit van gedeind te zeen:

foto10

De Sjter 1 begoosj vandaag aan heur zjwaore serie taege de nummers 2, 3 en 4 van de ranglies. Kommende waeke wachte Geusselt Sport en LHC. Vandaag waor Venlosche Boys te taegesjtenjer. De Sjter sjtartte mit Esat in de goal. In de achterhoede sjpeelden Roel, Davy, Paolo en Stan. Op ’t middenveldj Ricardo, Guido en Ikram. En veurin Thijs, Hassan en Marko.

Helaas brach de wedsjtreid neit wat d’r van gehaop waor. Reporter Randy sjprook van unne complete off day. Communicatie-fouten, sjlech dekken en insjattingsfouten zurgden nao ‘n hauf oer al veur unne 0-3 achtersjtandj. Vlak veur rus gloorde nog effe haop wie Ricardo unne perfecte sjtaekpass goof op Hassan dae doeltreffend aafronjde en de 1-3 aanteikende. Wae verwach houw dat de tweede helf vuurwerk zou oplevere, koom bedraoge oet. De ploug oogde oetgeblus en moosj auch nog de 1-4 incasseren, zonger zelf nog get te kenne creëre. Sjnel vergaete dus deze wedsjtried.

En daomit koom ’n einde aan ’n weekend dat nog zo haopvol begoosj mit ’n gala-veursjtelling van de veteranen op zaoterdig, maar dat vandaag louter dikke nederlagen opleverde veur ozze seniorenteams. Letste woor is aan 4e elftal-sjpeler Pedro Willems dae ’n gesjprek aanknuipde mit dames 1-sjpeelster Clannad Koumans, de vriendin van 2e elftal-sjpeler Stefan Frissen.

Pedro: “Maedje wo hubse Stefan lere kenne?”

Clannad: “Ja bie De Sjter, he.”

Pedro: “Dan besse toch waal unne keer op ’t gooi moment op de gooi plaatsj gewaes, want normaal zuut ‘r d’r neit oet en kent ‘r neet meer rech veuroet kieke, zo zaat is ‘r.

Rob Sjulpe

 

 

 

 

 

 

 

 

 

rksv de ster walking football 2018 1x250

ster webshop links 250

blessurehulp left banner

De Ster Nieuwsbrief - Blijf op de hoogte!

Deze website maakt gebruik van cookies om voorkeursinstellingen bij te houden en analytische cookies om de website te optimaliseren.