Wedstrijdverslagen

T waor ’n ouwerwets top-weekend bie De Sjter. Ut eesjte won bie Limburgia en is nog ummer ongesjlage dit sezoen. Ut tweede pakte ’n knap punt oet bie NWC 2 en houw eigenlijk verdeind om te winne. Ut driede pakte heur eesjte punte dit sezoen en deig dat via ’n prachtige euverwinning op Hulsberg 2. En auch de veterane wonne nipt van ’n cattanaccio-team van Sjpaubaek dat de bus in de eige 16 houw geparkeerd. De Sjter 4, 5 en de dames moosjte de punte helaas aan de taegesjtenjer laote. Nog ummer gein 100% score dus dit sezoen, maar veer gaon de goei richting oet mit os senioren-teams. En dus is d’r waer genog om euver nao te kalle.

Te beginne mit de veterane. Die trapten op zaoterdigaovend waer ’t seniorenweekend aaf. En ’t waor good old Paul Janssen dae op zaoterdigochtend geliek veur get onrus zurgde op de groepsapp:

foto1

Rondj veier oer verzamelden de meesten zich in de kantine op ’t Hetjen. Dao vertelde Ron Marschall nog ens greutsj dat ziene zoon Ken erg sjterk houw gesjpeeld veur zien Belsje club. Mit gevuil veur humor en zelfsjpot zei de 1,65m lange Ron dao euver: “Auw muk, Ken houw unne donkere jong taege zich sjtaon. En dae waor zelfs nog unne kop groter es mich.”

Om kwart op veier zou vertrokke waere, zo waor aafgesjpraoke, mer dat leep allemaol get oet. Zo zeer zelfs dat Robbie van der Linden zich maar ’n pilske ging besjtelle bie Jo. Willem Thewissen reageerde geliek.

Willem: “Enne Robbie, vandaag waer mer 1 helluf?”

Robbie: “Ich hub de trainer net gevraog. Dae zei ‘pak dich nog mer eine’.

Willem: “Jao, en dalik zaet ‘r ‘robbie, wae drink veur de wedsjtried sjteit bie mich d’r naeve’.

Misha Dreessen, doorgaons sjtandaard 20 minute te laat aanwezig, waor vandaag ens op tied veur de verangering en houw om hauf 5 auch nog get te melje. Mer Willem dekselde ‘m geliek.

Misha: “Jonges, motte veer neit ens gaon rieje? Veer beginne euver ’n hauf oer.”

Willem: “Jao jonges, laote veer gaon. Misha is ummer gaer oppe tied.”

Mit 11 fitte sjpelers, 2 hauf-fitte in de persone van Robert Lucassen en Willem Thewissen, en ein noodverbandj in de persoon van Roger d’n Doam, toog men nao Sjpaubaek. Mit zo’n dunne bezetting waor ’t effe sjrikke wie captain Mat Cremers in ’t kleidlokaal auch nog ’t volgende te melje houw.

Mat: “Leon, ich maog van de tandjarts maar 1 helluf sjpele.”

Leon: “Van de tandjarts???”

Mat: “Jao, ich houw toch dat loak in de mondj. Ich hub aafgeloupe waek implantate gekrege in de mondj.”

Leon: “Doe houfs toch neit mit de mondj te voetballe?”

Eddy: “Nae Leon, maar door die implantate in de mondj kent hae noe gein tendje meer biesjtaeke in de tweede helluf.”

Mat leet zich echter neit van de wies brenge en houw zelf auch nog get interessants te melje: “Jonges, op vriedigmiddig om drie oere begint veur mich ummer ’t weekend. Dan gaon ich op ’t werk nao de dames WC, kniel dao neer en lèk de bril aaf. Noe kiek neit zo sjtom allemaol. Ich weit dat vaol meer mansluuj dat doon. D’r durf allein bienao geine veur oet te komme.”

Taegesjtenjer Sjpaubaek waor unne neit te ongersjatte taegesjtenjer. Twee jaor geleje houwe de vets dao nog duchtig klop van gekrege. Maar ’t waor auch de taegesjtenjer taege wae Roger d’n Doam zien “finest hour” es controlerende middenvelder houw gekend. Bie ’n euvervloed aan sjpitse, houw Roger ’n paar jaor geleje op ’t middenveldj motte acteren taege Sjpaubaek. Dao ongersjupte Roger, dae op dat moment get aan de zjwaore kantj waor, geliek 3 bel binne 5 minute. Triomfantelijk zei d’n Doam toen taege ziene directe taegesjtenjer: “Hoppa, Roger de sjtofzuiger.” Wo op dae van Sjpaubaek, nao de boek van Roger kiekend, antjwoordde: “Sjtofzuiger? Dan waal eine dae neudig ziene zak ens mot laegmake.”

Nao ’n korte warming up koosj aan de wedsjtried begoosj waere. Misha kreeg beheurlijk get commentaar te verdure omdat hae mit witte heisje euver ’t veldj leep. Verwiezend nao de intocht van de Sint dae middig, zei Misha dao op: “Sorry jonges, ich hub net nog in de have motte wirke.”

De wedsjtried waor beheurlijk eintonig. ’T waor allein mer einrichtingverkeer op de goal van Sjpaubaek aan. Daodoor waor ’t continu druk in de 16 van Sjpaubaek en dus koom De Sjter neit wiejer dan aafsjtandj-sjeut van Robert, Eddy, Robbie en Rob, en unne kupbal van Jack. Maar de sjterke keeper van Sjpaubaek koosj daomit neit versjalk waere.

In de rus noom Willem Thewissen ’t woord.

Willem: “Coach, Robbie en ich loupe os kapot op de rechterflank, want (rechshauf) Mischa is nurges te bekenne. Dae lup ummer in ’t midden omdat Rob Sjulpe ’t dao neit kent beloupe. Maar goud, wiejer lup ’t aardig jonges. Maarre Leon, ich kom d’r oet. ’T ging noe ein helluf goud en ich gaon niks forceren. Dalik loup ich mich waer get op.“

Thijs: “Willem, sjpeel noe nog effe door. Dan kom ich dalik veur dich d’r in.”

Willem: “Neit te lang dan, he Thijs.”

Leon: “Nae wach mer. Robert sjpeelt geweun nog effe door en dan geit Mark rechsback sjpele en dan kens doe wissele Willem.”

Willem: “Mot ich d’r oet?“

Eddy: “Ja, doe wols toch d’r oet?”

Willem: “Ich houw gedach dat geer dan allemaol ging zegke dat geer mich neit koosj misse. Vilt dat effe taege. Leon sjmit geweun de ganse ploug om, om mich te kenne wissele. Lekker is dat.”

Nao de rus ut zelfde sjpelbeeld. Einrichtingverkeer op de goal van Sjpaubaek aan. En de enkele keer dat Sjpaubaek wol countere, woort dat vakkundig opgelos door de krachpatser Paul Janssen, de sjneltrein Dennie Vorstermans, de lepe Marc Lacroix en “de patron” en captain Mat Cremers. De aafwezige sjtopper Gerard Martens woort eigenlijk totaal neit gemis. Sjterker nog, in de rus mirkde d’n Doam in ’t kleidlokaal op: “hey jonges, zonger Gerard hubbe veer eindelijk waer ens ’n team op de wei mit allein mer zjwarte sjoon.”

Op ’t veldj woort de Sjteinder druk oeteindelijk te vaol veur Sjpaubaek. Eddy Ubbink woort op links deip gesjtuurd. Ex-prof Jacky Linders trok ziene taegesjtejer richting 2e paol en coachte ‘legk terugk’. En es Jacky get zaet, dan wurt dat oetgeveurd. De bal woort dus terugkgelag op de mitgeloupe Rob Sjulpe dae de bal allein mer langs de keeper in ‘t netje houfde te sjuve. De 0-1 tusjesjtandj beteikende auch geliek de eindsjtandj en tevreje woort ’t kleidlokaal opgezoch. Dao houw Willem Thewissen echter tot sjrik van jederein ’n trieste mededeiling.

Willem: “Jonges, wach effe mit douche. Ich hub vervaelend nuujts. Ronny Marschall kreeg ne top de bank tillefoon oet Sjtein. Bliek dat bie de Poart unne aansjlaag is gepleeg op alle sjoon vrouwluuj…. Mer d’r zeen gein dooie gevalle.”

Rene: “Op sjoon vrouwluuj in de Paort? Nae, zelfs gein gewonje dan waarsjienlijk.”

Vervolges houw Mat nog get verhaole te vertelle. Noe mot geer weite dat Mat zich doordewaeks ummer tusje de chique van Mesjtreich bewaeg en dat ummer heel subtiel leet mirke door get te zegke wie dit:

Mat: “Nae jonges, champagne drink ich allein mer oet de navel van ’n vrouwmusj.”

Misha: “Dus doe wuls eigenlijk zegke dasse nog nooit champagne gedronke hubs, Mat?”

Robert: “Dae kense baeter oet de navel van d’n Doam drinke. Dao kense unne liter in kwiet.”

Noe mot geer trouwes neit de indruk kriege dat Mat Cremers allein mer sjtomme en vieze kal d’r oet huijt. Mat is auch ’n zeer sociaal bewoage persoon. Zo zei hae in de kantine in Sjpaubaek dat hae bezig waor mit ’t organisere van ’n activiteit veur de Katholieke Sjteinder Damesbond. “Ich denk perseunlijk aan unne “wiks-clinic”, aldus Mat.

Auch Ron Marschall houw genog te vertelle nao de wedsjtried. Omdat 95% daovan toch weggecensureerd zou waere, vertel ich allein die twee wo geine vieze kal in veurkoom. Eesj sjtaond aan de pisbak.

Ron: “Rob kiek, hie haet net veur mich eine gezeik mit haore oppe buul. Dat is unne ouwerwetse gewaes.”

En vervolges zittend in de kantien.

Ron: “Alle mansluuj die getrouwd zeen, zeen neit gelukkig in de liefde.”

Mischa: “Enne?”

Ron: “Ja oke, Mischa waal. Maar Nancy (van Mischa) neit.”

Mischa: “Wie wits doe dat?”

Ron: “Ich hub facebook.”

Paul: “En tinder.”

Vanoet de kantien in Sjpaubaek vertrokke de echte die hards vervolges nog nao De Poart, wo toevallig auch soccer-mom Miriam aanwezig waor. En dan zulse zeen dat the usual suspects waer effe op de foto motte:

foto2

Zo, dat is waal effe genog euver de veterane. Door nao de zondig, want dao woort genog gevoetbald. Te beginne mit ozze dames. Die moosjte ’t vandaag opnumme taege koplouper SVME. De veurbereiding op dae wedsjtried begoosj mit ’n intieme onthulling, wie de kup geteld woorte en Clannad ontbrook. Marwa zurgde echter, in ’t plat notabene, veur opheldering: “Die is nog bie De Frusj waarsjienlijk.” En noe mot ich dao op aanvulle dat ich van de jonges van 2 al doorkreeg dat De Frusj vandaag mit unne verdacht opvallende smile in de bus nao NWC zoot. Dat zeen toch de leuke dinger es reporter. Af en toe komme dinger zo leuk biejein.

En zegk noe zelf: Clannad en Stefan zeen auch geweun ’n leuk sjtel:

foto3

Aan de warming up en de meziek in ’t kleidlokaal loog ’t vandaag auch neit bie de dames. Allebei waore die top. En dae lien woort auch in ’t veldj doorgetrokke, want zeker de eesjte helf sjpeelde De Sjter geweun sjterk taege de koplouper. D’r woorte vaol kanse gecreëerd, mer helaas neit benut. En dan treedt de aloude voetbalwet in werking: esse de kanse zelf niet benuts, dan deit de taegesjtenjer dat. En dus ginge ozze ladies helaas mit 3-0 de boot in. Mer ze maoge waal greutsj zeen op de prima partie die aafgeleverd woort.

Helaas gein foto’s van de dames dees waek. Zelfs gein van de op zaoterdigaovend bie Tilly op de bar dansende Sanne. Althans, dat dach ozze reporter bie de dames, Robin Martens. Maar Robin, es deze journalist heurt dat Sanne op de bar haet sjtaon dansen, dan wurt d’r effe échte ongerzuiks-journalistiek bedreve en dan kump ’t bewies vanzelf baove water:

foto4

Nao dat sjtrakke buukske van Sanne, kenne veer door nao de heren teams op zondig. Van De Sjter 5 ontbrik op dit moment helaas nog informatie. “De Beesten” woorte echter op ‘n gevuilige 7-1 nederlaag getracteerd door OVCS 4.

Dan ’t veerde. Dat moosj vandaag aantraeje taege subtopper Havantia 3. Coach Nordhausen houw gein enkel risico genomme en zien ganse selectie op vriedig én zaoterdig biejein gebrach. Dit om d’r absoluut zeker van te zeen dat d’r geine nuchtere op de wei zou sjtaon op zondig. Op vriedigaovend waor d’r aan de teambuilding gewirk bie de sjponsoren Fer van ’t Kempke en Tilly van de Bekker. Op zaoterdig moosj De Sjter 4 vedette Stan Ortmans a.k.a. DJ Stan the Man dreije op ’t blaaierbal bie Tilly en dus waor de ganse ploug dao auch waer paraat. Dat zo’n tweedaags trainingskamp mesjiens waal get te vaol van de mannen van 4 eiste, woort dudelijk wie sjpelverdeiler Rick Kostons rondj middernach in ’n veur heum ongebroekelijke pose woort aangetroffe:

foto5

Op zondigochtend waor ’t de vraog wie “De Zoepnaze” dees zjwaore veurbereiding zouwe vertaere. Wat auch al neit holp waor ’t feit dat de beoogde sjeidsrechter (de bie De Sjter 1 gesjorste Roel Heffels) neit koom opdage. Volges Kenny omdat hae mit ziene zaate buul nog in zien nes loog te sjtinke. Roel houw echter unne angere oetlegk:

foto6

Wie de plouge van De Sjter 4 en Havantia 3 ’t veldj betroaje woorte ze onverwachs getracteerd op vuurwerk. Dat vuurwerk kreeg auch op de mat ’n vervolg. Want de eesjte helf wiste de zoepnaze goud weersjtandj te beije aan de hoger geklasseerde men oet Maesj. De tweede helf waor d’r echter gein haute meer aan. Al wis Noudje Claessens 10 minute nao rus waal nog mit un veurtreffelijke redding unne bal oet de goal te boksen. Helaas houw de fluitende Math Haagmans in de gate dat Noudje gaar neit keepte en lag hae de bal op de sjtip. Dae achtersjtandj koom ut veerde neit meer te baove. Oeteindelijk leep de score nog op tot 0-5. “Mer laot mich noe geine aankomme dat de veurbereiding te zjwaor is gewaes”, fulmineerde coach Nordhausen.

Dan De Sjter 3. Dat houw veurige waek nog jammerlijk verloare van Sjtein-Zuid en waor dus oet op revanche. Coach Mark Habets kreeg veur de wedsjtried echter opbeurend nuujts. Want nao ’n maonjelange aafwezigheid moch vedette Rene Gooren vandaag eindelijk zien rentree in de selectie make. Op de vraog aan coach Habets of hae blie waor mit de rentree van ziene sjpelbepaler, reageerde hae: “Rene wae?”

Desondanks kent auch Mark neit ontkenne dat de rentree van Rene twee grote veurdeile haet. Op de eesjte plaatsj hubse zo unne goeie sjpeler d’r bie. En op de tweede plaatsj besse zo verlos van dae sjtommigheid die hae zich de letste waek es assistent-trainer ummer d’r oet sjloog langs de lien.

Rene zelf deit versjlaag van de wedsjtried van 3:

Voetballend begoosjte veer goud en veer tikten die veurwaartsen van Hulsberg 2 gans dul. Veer krege get kanse en dat leverde oeteindelijk de 1-0 op: Marco Verhoeven, ozze super-sjeng ging goud door op de keeper en waor get sjneller bie de bal nao unne passe van Ralph Doek.

Steef van de Woude ging vervolges twee keer heel sjtijlvol nao de grondj rech veur de reservebank van 3. Ech un genot om haer te kieke, unne volle achternaef van Beppie Kraft dae tot twee keer toe mit zien naas in de blaajer duuk. Auch Usman Kahn waor op dreef en dreijde zich ’n paar keer goud vrie in de sjtijl wo in hae normaal in de zaak de kebab aan ’t sjpit dreijt.

Op de bank waore de mannen van 3 zich al aan ’t opmake om veur ’t eesj dit sezoen mit unne veursjprong de rus in te gaon. Vlak veur rus zat Hulsberg echter nog unne keer aan en oet ’t niks veel de 1-1. Gelegenheidskeeper Dennis Wijnen zoot d’r nog aan mer hae waor onhoudbaar.

In de tweede helf de langverwachte rentree van Rene Tsunami (aldus Rene zelf) en de get minder lang verwachte rentree van Mark Caubo. Hiedoor houwe de godenzonen veurin get meer gevaor en kreeg men waer de neudige kenskes. En oeteindelijk veel auch de dik verdeinde 2-1. Unne lange bal van Jos “op de sjtropdas” Ostendorf bereikte Marco Verhoeven. Dae keek goud wat de keeper deig en lag ‘m d’r beheers euverhaer. Vervolges maakte B-jeugdsjpeler (en zoon van niet-spelend veteraan Gé) Joep Hügel zien debuut bie de senioren door es letste man in te valle veur Jos. En dat deig Joep veurtreffelijk. Want zelfs onger de immense druk van ’t alles-of-niks sjpelende Hulsberg bleef hae ieskoud euvereind en sjleipte daomit de punte euver de eindsjtreep. Rene Gooren leek op ’t lets nog op waeg nao de 3-1 maar woort onreglementair opgevange door de keeper van Hulsberg. De sjeidsrechter leet dat begoan, maar dat deerde neit. De eesjte punten waore ’n feit en dat woort gevierd mit ’n dik verdeinde sjotel beier in ’t kleidlokaal.

Dan door nao ozze beloften, De Sjter 2. Die hubbe dit sezoen mit dubbele pech te kampen. Un aantal eige sjpelers geblesseerd en auch nog ens waekelijks luuj aaf motte sjtaon aan De Sjter 1 omdat men dao auch mit blessures en sjorsinge kamp. Dat beteikent dat ’t uutesjte wurd gevraog van de euverblievende sjpelers en staf van 2. En dat verg dus ’n ganse angere veurbereiding dan die van de zoepnaze van 4. Gein nachtelijke kroegentochten veur sjpelers en staf van 2, mer veural rus pakke, zo luidt het devies. En dao heel men zich veurtreffelijk aan dees waek.

Zo pakte coach Crutzen doordewaeks nog effe get extra sjlaop:

foto7

En vleugelsjpits Youri Voesten deig op vriedig om 5 oer, veuraafgaond aan de training, op de bank nog effe unne “powernap”:

foto8

En zelfs in de bus nao NWC Asten vandaag woort d’r door vlagger Roy Vanmulken en centrumverdediger Cyril Bruijnen nog effe ’n uigske toegepitsj:

foto9

Euveriges leidde ’t maken van dees foto’s in de bus waal tot ’n sjtevige discussie.

Bart: “Jari, doe bes ech unne sjmeerlap.”

Jari: “Alles, veur in ’t versjlaag, Bartje.”

Bart: “Jonges, Roy is zich mentaal aan ’t veurbereiden op de wedsjtried. Es geer dat noe auch ens allemaol deig, dan wonne veer mesjiens auch ens unne keer.”

Joep: “Hey Cyril sjleep auch jonges. Effe ’n foto make.”

Frank: “Teiken ‘m eesj ’n sjnörke.”

De wedsjtried taege NWC oet Asten waor unne belangrieke veur De Sjter 2. NWC sjting op 7 punte en De Sjter op 3. Dus ’n euverwinning zou ozze beloften waer aansjleiting gaeve mit de naocompetitie-plaatsje. Op de ku(ns)tgraasmat van NWC zou de windj vandaag ’n grote rol gaon sjpele.

T tweede, dat dus dun in de sjpelers zit, houw vandaag un extra troef op de bank: de van ’n blessure hersjtellende keeper Robin Heijnen zoot, veur noodgevallen, es veldjsjpeler op de bank. ’N Invalbeurt waor ‘m vandaag echter neit gegund. En dat is mer baeter auch. Veer hubbe Robin lever truk in de goal op 1 of 2.

De Sjter 2 begint fel aan de wedsjtried maar de eesjte kans is veur NWC. Unne vrieje trap wurd door de windj gevange en belandj bie unne sjpeler van NWC dae ‘m taege de boetekantj van de paol volleert. De volgende grote kans is veur De Sjter: Bart Linders let prima op en pik unne te korte terugksjpeelbal op en kump 1 taege 1 mit de keeper, dae helaas prima redt. In de 8e minuut kump os tweede dan toch (veur ’t eesj dit sezoen) op veursjprong: de net 16-jaorige Bob Dukers zet goud door nao waer unne te korte terugksjpeelbal en bringk de bal bie Youri Voesten. Dae leet zeen dat de power-nap op vriedig ‘m goud houw gedaon en knalde de bal vanaaf 20 maeter binne. HOPPPAAAA 1-0 veur “de sjpelers”!

NWC waor voetballend de baetere ploug maar de beste kansen waore veur de gael-zjwarte. Meest opvallende in de eesjte helf waor dat keeper Bastiaan de doeltrappen mog numme vanaaf de penalty-sjtip. De reje waor dat de windj de bal ummer deig wegblaoze en de koel in de penalty-sjtip de einige plek waor wo de bal waal bleef ligke.

De tweede helft houw De Sjter veural pech door de sjeidsrechter dae ’n aantal onnaovolgbare besjlissinge in Sjteinder naodeil noom. “Krismes vult al vruig dit jaor”, beet de geblesseerde Jari Knoops ‘m vanaaf de kantj toe. Dieptepunt waor ’n penalty veur NWC, naodat de verdediger van De Sjter de bal mit unne zuvere tackle corner houw getik. NWC besjloot ’t cadeau dan auch maar oet te pakke en teikende de 1-1 aan. Es gevolg van de irritaties euver de besjlissinge van de man in ’t zjwart, ging de wedsjtried wie ’n nachkaers oet. De sjpelers van 2 bleve dus mit ’n dubbel gevuil achter. Enerzijd waor d’r ergernis euver de gemiste kan op drie punte en frustraties euver sjeidsrechterlijke dwalinge. Maar angerzijds waor d’r waal, mit de dunne selectie en twee A-jeugdsjpelers in de basis (Bob en Sjoerd; Cyril is euveriges auch nog A-jeugdsjpeler maar sjpeelt al vas op 2) ’n fantastische prestatie neergezat. Klasse gedaon mannen!

Tot sjlot dan De Sjter 1. Die ploug houw op vriedig nog same genoate van heerlijke spaghetti van coach Czornyj. Terwiel zien sjpelers zich te goud deige aan de sjlierte, deig Ronny nog effe ’n subtiele poging om, mit unne teijer spaghettig, De Sjter 3 vedette Ralph “Gladiator” Doek euver te haole om zich waer besjikbaar te sjtelle veur 1.

foto10

Nao dae mislukte poging moosj os vlagge-sjip ’t vandaag doon mit de men die besjikbaar waore. Vandaag miste men Randy en Tim mit blessures, Barney dae nog neit mitdeig en de gesjorste Roel. D’r waor vandaag ’n basisplaatsj veur Marko Jevric in de punt van de aanval. De wedsjtried tusje twee subtoppers op de ranglies kenmerkte zich door twee versjillende voetbal-sjtijle: De Sjter dat, ondanks ’n sjlech besjpeelbaar veldj, verzurg probeerde te voetballe en BSV Limburgia dat de lange bal hanteerde.

De Sjter waor de baetere ploug en koom aan de leiding via Ikram. Dae ronjdde in de 20e minuut unne veurzet van Thijs aaf mit ’n sjieke boogbal euver de keeper. Veur rus koom ozze hoofdmacht auch nog op 0-2 via ’n echte slapstick-goal. Marko Jevric zette prima door en brach de verdediging van BSV Limburgia in verlegenheid. In totale paniek trapte dao op unne sjpeler van BSV de bal via ziene eige keeper in de goal.

Vlak nao rus leep De Sjter zelfs oet nao 0-3 toen opnuuj Thijs mit unne veurzet Hassan in sjtaot sjtelde om te scoren. Ozze mannen vergote vervolges nog wiejer oet te loupe. In dees fase houw ’t auch zomaar 0-5 kenne sjtaon. Zo raakte onger angere Marko Jevric nog unne keer de paol.

Limburgia ging ’n kwarteier veur tied alles of niks sjpele en dat brach De Sjter toch in verlegenheid. Want toen nao de 1-3 auch nog 5 minute veur tied de 2-3 veel, waor ’t effe batse kniepe. In die fase heel keeper Essat zien ploug euvereind. In de allerletste minuut waor ’t Thijs dae ziene derde assist van de middig goof, dit keer op Wesley dae de verlossende 2-4 taege de touwen knalde.

Nao de wedsjtried waor d’r, ondanks de nederlaag, nog heuglijk nuujts veur de mannen oet Brunssum, want hunne grensrechter moch oet de henj van Frans Beaujean de gouden eikel-trofee ontvange. Unne pries dae de letste jaore sjteevas gereserveerd waor veur de grensrechter van Caesar.

Enfin, eindelijk waer ens drie punte veur os eesjte, nao unne rits gelieke sjpele. De ploug is nao 10 wedsjtrieje nog ummer ongesjlage (4 euverwinninge en 6 keer geliek) en haet ’n doelsaldo om de vingers bie aaf te lekke. Coach Czornyj waor nao aafloup dan auch blie mit de prestaties van zien ploug tot noe toe: “Veer hubbe toch al de neudige blessures en sjorsinge te verwirke gehad. Desondanks zeen veer nog ummer ongesjlage en dat maak mich uitermate fier!”

Kommende waek sjteit veur De Sjter 1 ’n baeker-treffen taege 1e klasser Bekkerveld op ’t programma. En de waek daonao de competitie-wedsjtried taege mede-topploug Geusselt Sport, dat vandaag LHC klopte. ’T is uitermate sjpannend baovenin de 2e klasse en gans Sjtein maog d’r toch waal greutsj op zeen dat ozze jonges alwaer mitdoon om de prieze. Grote klasse Ronny en sjpelers!

T Sjlotwoord is dit keer veur verzurger Wesly Wanten. Dae is dees waek aan ziene pols geopereerd. En ’t roesje dat hae es verdouving houw gekrege houw in ’t ziekenhoes zien waore aard aan ’t leich gebrach:

foto11

Rob Sjulpe

De Ster Nieuwsbrief - Blijf op de hoogte!

grote clubactie steundester banner links

rksv de ster walking football 2018 1x250

ster webshop links 250

activiteitenoverzicht

Geen evenementen

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.