Wedstrijdverslagen

D’r zeen van die weekende die se lever zo sjnel muigelijk vergits... De veterane moosjte zaoterdig, ondanks ‘n selectie van 28 man, hunne wedsjtried aaflasje omdat d’r te vaol aafmeldingen waore. En op zondig kome ’t driede en ’t veerde mit ’t sjaamrood op de kaken puntloos thoes oet Aelse. Get wo euver Patrick Nordhausen in de kantine van Aelse nao aafloup zei: “Zulle veer op z’n minst dan nog effe mit krukke beginne te sjmiete hie? Dan hubbe v’r tenminste nog gét gehad.”

Gelukkig is d’r echter auch dit weekend waer genog gelache en sjtomme kal verkoch op en rondj de velje. Geregeld mit pechvogel Mark Habets es lijdend veurwerp. En op voetbalgebied mit dé voetbalfemieje van Sjtein, de Conjours, es oetblinkers: Stef bie 3, Pascal bie 4 en Mandy bie de veterinne. Dus laote veer maar sjnel euvergaon tot ’t versjlaag van dees waek. En bie veurbaat al excuses aan Johnny “van de Sjpin” dae mich vanaovend nog op ’t hart drukte “houd ’t kort vandaag, Rob”. ’T is mich neit geluk, Johnny.

T Versjlaag gaon dit keer al beginne op de vriedigaovend. Want Patrick Nordhausen houw zich ’n paar waeke geleje al taege Tom Keulen laote ontvalle dat ’t toch ens tied woort dat de leger elftalle get ginge organisere in de kantine. En dus woort door beide heren (en Cindy Peters) contact gezoch mit vertegenwoordigers van alle elftalle en woort besjlaote om neit allein sjtom in de kantine te gaon zoepe maar om d’r ’n combi van voetballe, goeie meziek en (toch) zoepe van te make. Eesj ’n ongerling gemend toernooi mit alle sjpelers van 3, 4, 5, de veterane, de dames en de veterinne. En daonao unne feestaovend in de kantine mit DJ’s van jeder team die de top 10 van hun eige team mochte dreije.

Letste sjtukske van de puzzel waor nog dat ’t hoofdveldj geregeld moosj waere veur ’t toernooitje. Patrick, sjluwe vos es ‘r is, houw zich bedach dat dat op tactische wieze geregeld moosj gaon waere mit hoofdtrainer Czornyj. En dus woort Cindy Peters, de einige 37-jaorige inwoonster van Sjtein mit ’t lichaam en de oetsjtraoling van ’n pupke van 18, nao veure gesjoave om Ronny te euvertuge. Maar achteraaf waor dat neit ens neudig gewaes, want Ronny reageerde wie de clubman dae hae is: “Ich ben neit allein de coach van 1, ich ben hie veur de ganse vereiniging, dus es geer genog man biejein krieg veur ’n fatsoenlijk toernooi, dan sjuve veer.”

En dat biejein kriege van genog man waor gein enkel probleem. De opkomst waor geweldig. Maar leifs 48 sjpelers van de diverse seniorenteams deige mit aan ’t ongerlinge toernooitje. En nog vaol meer sjpelers en aanhang maakten d’r vervolges in de kantine nog ’n sjiek feeske van.

afb1afb2afb3

Maar tiedes de feesaovend woort auch dudelijk dat ’t ongerlinge toernooitje ’n sjlachoffer houw geëis. En neit de minste: De Sjter 3-sjpeler/coach/inspirator houw zich mit ’n sliding geblesseerd. En volges de toekiekende Ralph Doek waor ’t auch nog ’n wereld-sliding: “Hae zat ‘m in ter hoogte van de dug out en koom pas 18 maeter wiejer taege de boarding van de achterlien sjtil.”

Oeteindelijk bleek dat Mark ’n sjeurke in unne knoak houw opgeloupe en moosj zien bein in ’t gips. En natuurlijk is dat klote veur Mark, en natuurlijk wunsje veer Mark allemaol vaol baetersjap en ’n sjnel hersjtel. Maar dat wult nog neit zegke dat veer noe al die leuke verhaole rondjom Mark weg motte laote. Bie deze dus ’n samenvatting van de leukste opmirkinge van medesjpelers. Om te beginne op vriedigaovend in de kantine:

Jos: “Jonges, wie kump Mark noe in Aelse murge?”

Ralph: “Björn wirk toch bie Collé. Dao hubbe ze vas waal unne heftruck of kraan daoveur.”

Björn: “Nae, die gaon maar pes 5 ton.”

En effe later in de kantine:

Rob: “Wat is mit dich aan de handj?”

Mark: “Ich ken neit meer loupe.“

Jos: “En dat waor eigenlijk jus ummer zien sjterke punt.”

En daonao in de nach van vriedig op zaoterdig veur ’t hoes van Mark in en rondj de auto van Jos Ostendorf dae Mark nao hoes houw gebrach.

Jos: “Zal ich effe mit dich mitloupe, Mark?“

Mark: “Nae, besse gek. Rie maar door. Ich kom waal dao.”

5 minute later waor Jos al weg en houw Mark eindelijk de 5 maeter van de sjtoep nao de veurdeur euverbrugk. Wie hae zich echter bedach dat hae de trap nog op moosj om in bed te komme, besjloot hae de tillefoon te pakke en zien lieftallige Natascha te bellen.

Natascha (net wakker gewaore): “Ja?”

Mark: “Ich sjtaon bie de veurdeur en hub las van mien bein, kense mich effe komme helpe?”

Natascha: “Esse kens zoepe pes hauf 2 sjnachs, kense auch zelf nao baove loupe!”

En vervolges op zaoterdigmiddig aan de tillefoon tusje Mark’s vrouw Natascha en heure broor (en Mark’s teamgenoot bie 3) Björn.

Björn: “Enne, wie is ’t mit Mark?“

Natascha: “Sjei mich oet! Dae haet mich aafgeloupe nach get gemaak.“

Björn: “Haha, enne?”

Natascha: “Dae belt mich eesj midde in de nach wakker omdat hae de trap op geholpe moosj waere… Nou, dat haet hae sjoon zelf kenne doon. Maar toen koom ‘t… “

Björn: “Wat?”

Natascha: “Meneer houw las van zien bein en houw al veurzorgsmaatregele genomme veur es hae sjnachs of sjmurges moosj pisse.”

Björn: “Wie bedoel se?”

Natascha: “Ich waer sjmurges wakker, zeen ich un vaas naeve ’t bed sjtaon. Ich denk nog: wat deit die vaas noe hie? Wul ich ze oppakke, bliek dat Mark die vaas haet volgezeik!”

Björn: “Dat meinse neit!”

Natascha: “Es ’r zich noe op z’n minst nog ‘n vaas houw gepak zonger loaker ongerin!”

En op zondigochtend bie aankomst in Aelse, oet de mondj van Mark’s zoon River.

Rob: “Enne River, houw pap vannach ’n vaas mitgenomme nao bed?”

River: “Jao, veur in te plasse. Omdat hae pien houw aan zien bein.”

Björn: “Nou.. volges mich houw ’t meer te make mit die 20 juupkes die hae gehad houw dan mit zien bein, River.”

En op zondig in ’t kleidlokaal veur de wedsjtried tusje Haslou 3 en De Sjter 3:

Stef: “Jonges, kump Mark auch nog?”

Rene: “Jao, dae appte mich net. Hae is ongerwaeg.”

Raoul: “Van de veurdeur nao de auto?”

Tot sjlot dan nog unne sjteek onger water van Mark aan verzurger Wesly Wanten. Dae koosj natuurlijk op vriedigaovend, vlak nao ’t gebeure, nog gein diagnose sjtelle. Maar volges Mark waor Wesly dao toch te kort gesjoate. Al leet Wesly zich die besjuldiging auch neit gevalle:

afb4Zo… Mark, veer zeen d’r. De res van ’t versjlaag geit neit meer euver dich. Euver nao de wedsjtrieje. De veteranen houwe op zaoterdig geine wedsjtried. 25 sjpelers in de selectie en toch motte aaflasje omdat d’r te vaol aafmeljinge waore. Al begin ich dao auch mien vraogteikes bie te zetten. De aafgeloupe drie daag hub ich namelijk al zeker 15 veterane gesjpraoke die baalden dat ze neit houwe kenne voetballe. “Pep Fredrix haet mich toch ech doorgegaeve dat veer te weinig man houwe”, aldus Willem Thewissen. “Dae zal zelf waal neit gekend hubbe omdat ‘r waer aan zien huwelijk moosj wirke”, aldus Gerard Martens.

Vilt d’r dan helemaol niks te melden euver de veteranen dees waek? Toch waal. Ein conversatie op de groepsapp wul ich uch namelijk neit onthaute. ’T begoosj mit ’n compliment van Gerard aan Robert Lucassen:

afb5

Maar van dat soort soft gedeuns, zeen ze bie de veterane neit ech gedeint. En dus lete de reacties neit lang op zich wachte:

afb6

T angere veterane team van De Sjter, de veterinnen, sjpeelde waal op zaoterdig. En dae wedsjtried waor veural memorabel vanwaege de rentree van Mandy Conjour. Mandy haet ongerhauf jaor neit kenne voetballe, mis noe eine kruusbandj maar scoorde desondanks twee keer. Tusje al die angere veurmalige godinnen sjitterde de sjter van Mandy zaoterdig ’t felste in de 8-0 vaeg-partie taege Sjinveld.

Dan sjnel euver nao de zondig, want dao woort waal genog gevoetbald. Te beginne mit “De beesten” van 5. Die moosjte vandaag thoes aantraeje taege Heidebloem. Helaas bleek dat de mannen van 5 op vriedig bie ’t ongerlinge toernooi al te vaol gegaeve houwe. Want op de 1-5 nederlaag veel neit vaol aaf te dingen. Ut doelpunt van De Sjter woort gescoord door Serge Grubbé. ”Un Vormdipje en auch get pech mit blessures, maar volgende waek waer geweun volle gaas d’r op”, aldus reporter Mike Schippers.

De Sjter 3 en 4 moosjte vandaag samen op pad richting Aelse. Allebei de teams sjpeelden om 11 oer de moder aller derby’s taege Haslou 3 en 4.

De zoepnaze van 4 begoosjte prima. Oetblinker Pascal Conjour maakte al sjnel de 0-1, maar domme euvertredinge van de gael-zjwarte leverden vervolges ’n paar geveerlijke vrieje trep op en dao veel auch de 1-1 oet. Vlak veur rus koom Sjtein-Zuid auch nog op 2-1 en toen leek de motivatie weg te ebben. Desondanks sjtartte De Sjter nao de rus waer prima, maar wie ’n paar besjlissinge van de sjeids in Sjteins naodeil oetvele, sjtortte alles waer in. Oeteindelijk wis Pascal Conjour nog ’n sublieme goal te score, maar ging men toch mit 4-2 de boot in. Reporter Kenny Lemmens, dae normaal “de nuance zelve is”, moosj nao de wedsjtried nog effe get kwiet euver unne goeie vrundj: “Man of the match vandaag waor Noudje Claessens. Dae kent not neit mit losse henj in de trein zitte. Wat un drama vandaag!”

Euveriges waor auch Peter Paes debet aan de nederlaag vandaag. Dae leep namelijk de ganse wedsjtried mit de kop in de wolken. De reje? Peter waor vriedigaovend nao Roda-ADO gaon kieke. Nao de wedsjtried leep “de lange Paes” niksvermoedend terugk nao ziene auto, wie hae inens woort euvervalle door unne ganse groep opgewonje sjpelers van ADO den Haag. Of ze mit Peter op de foto mochte. Peter waor dudelijk euvervalle door al dae aandacht en baalde eigenlijk nog van ’t puntverleis van zien Roda. Maar omdat hae auch neit de beroerdste is, wol hae bes mit eine sjpeler op de foto. En dat moment haolde nota bene daezelfde aovend nog de website van VI!!!!

afb7

Zou De Sjter 3 dan de eer kenne redden in Aelse vandaag? De veurteikene waore prima. De ganse selectie waor, op targetman Mark Caubo nao, compleet en waor zelfs nog aangevuld mit veteranen Stef Conjour en Rob Schulpen. Die vele trouwes qua laeftied gaar neit oet de toon, want mit unne gemiddelde laeftied van 39,6 jaor mot dit toch ’t oudster 3e elftal oet de clubgeschiedenis zeen. ’T waor zelfs zo erg dat Ivo van de Bergh mitlieje kreeg mit Belsje aanwinst Kristoff: “Jonges, Kristoff is veurig sezoen weggegange bie Polonia omdat hae dao allein maar mit veterane moosj sjpele, en noe zit hae hie mit os…”

Winnaar bie de wedsjtried van 3 waor vanmiddig de neutrale toesjouwer. Neit dat dae aanwezig waor vandaag, want al wat langs de kantj sjting houw ofwel ’n gael-zjwart ofwel ’n wit-zjwart hart en leet dat auch dudelijk heure. De Sjter sjtartte prima en drukte Haslou achteroet. Dat leidde nao 15 minute tot unne paniekerig weggetrapte bal dae door Rob in eine keer woort gesjtoake op Stef. Dae koosj allein op de keeper aaf, zoch henjig contact mit ziene verdediger en de bal ging op de sjtip. Achter de bal ging de belichaming van Sjteinder passie, Ralph Doek, sjtaon. De keeper van unne Haslou verwachtte unne pegel in de houk en besjloot dus al bie de sjtart van de aanloup richting linkerhouk te loupe. Doekie week echter neit aaf van zien plan en knalde de bal onhoudbaar langs de ore van de keeper door veur de 0-1.

De Sjter bleef dominere maar zakte daonao 10 minute wiet terugk in niveau. En dao maakte Haslou dankbaar gebroek van want binne no time sjting d’r 3-1 op de borden. Vlak veur rus frommelde Stef zich echter op de achterlien langs ziene verdediger, lach terugk op Raoul en dae sjoot beheerst en hel binne veur de 3-2 rust-sjtandj.

Nao de pauze waer De Sjter dat de boventoon veurde. Stef bleef op de randj van de 16 tusje 4 taegesjtenjers door piele, zoog de bal bie Rob belanje op de penalty-sjtip, dae ‘m onger de vout achteroet mit goof aan de doorgeloupe Stef dae sjnoei-hel insjoot en de score op 3-3 brach. Helaas doemde onoplettendheid achterin bie unne lange bal ut driede en ging men oeteindelijk mit 4-3 de boot in.

De Sjter 2 moosj vandaag aantreaje taege Venray 2, de ploug die veurig sezoen nog woort aafgetroef in de titelrace in de 1e klasse. Inmiddels acteren beide plouge in de hoofdklasse, wo Venray veuraaf al 10 punte houw verzameld en De Sjter pas 3. Deze wedsjtried waor veur ozze beloften de eesjte in unne serie van 3 taege plouge van (nao verwachting) geliek niveau.

De wedsjtried ging aanvankelijk geliek op. Beide plouge krege kenskes maar wiste die neit te verzilvere. De Sjter sjpeelde prima en zat prima druk veuroet, wodoor Venray lestig aan voetballe toekoom. Toch waore ’t de gasten die in de 34e minuut de score aopenden. Hunne sjpits houw ’n prima individuele actie en sjoot de bal koelbloedig en onhoudbaar binne.

Nao rust waor ’t einrichtingverkeer richting goal van Venray. De gasten waore op de counter weliswaar auch soms geveerlijk maar qua strijdlust en voetbal waor De Sjter de baetere ploug. Het ontbrook ozze jonges maar aan 1 dingk: scoren. Ondanks kansen veur Marko, Luc, Twan en Youri wis men gein gebroek te make van ’t veldjeuverwicht. De wedsjtried eindigde daodoor in ‘n 0-1 nederlaag. Maar ozze jonges maoge mit opgeheven hoofd terugkkieke. Es de kenskes de kommende waeke waal ens benut gaon waere, en ’t geluk ens aan ozze kantj is, geit os 2e zeker nog punte verzamele. Te beginne volgende waek oet taege mede-degradatie-kandidaat NWC oet Asten. De bus zal veur de supporters om 9.45u vertrekke.

Tot sjlot nog ’n hoogtepuntje oet de wedsjtried van 2, in de vorm van ’n gesjprek tusje rechsback Jari en de linksboete van Venray in de 80e minuut van de wedsjtried:

Linksboete: “Jij bent echt slecht!”

Jari: “Weit ich.”

Linksboete: “Vind je dat niet erg dan?”

Jari: “Nae, gaar neit. Ich houf neit goud te kenne voetballe om dich dalik ein bie te riete.”

Jari: “En doe bes trouwes sjtom.”

Linksboete: “Hoezo dat?”

Jari: “Omdasse 80 minute neudig hubs gehad om door te kriege dat ich sjlech ben.”

Dan ’t hoofdgerecht van vandaag. Os vlaggesjip moosj aantraeje taege de sympathiekste ploug oet de 2e klasse G: Sjarn oet Mesjtreech. Bie de entree woort Willem Thewissen vandaag geholpe door Steef van de Woude bie de verkoup van de loatjes. Mesjtreichtenaer Steef waor sjus aan Willem aan ’t oetlegke wie unne echte Mesjtreechtenaer Sjarn oetsjprik. “Sjaaaaaaaaaarn”, aldus Steef. ’T net op dat moment passerend besjtuurslid van Sjarn mirkde op: “Potverdomme, dan hub ich ’t auch al die jaore verkeerd oetgesjpraoke.

Vervolges geisse es reporter vlak veur de wedsjtried nog effe sjnel nao de WC, is ’t dao pikke duuster. Vanoet ’t duuster goof de sjtum van Ewan Snackers get toelichting: “Ja Rob, Willem Thewissen sjting net naeve mich en dae zaet ‘godverdomme Snacker, ich hub zonne kleine en doe zonne ganse grote. Kense dat leich neit effe oet doon, want zo ken ich neit pisse.”

De wedsjtried vandaag sjting onger leiding van de altied prettig fluitende sjeidsrechter Meijers. Dae vertelde nao aafloup dat hae nao dit sezoen ’n punt achter zien actieve loupbaan zet. En dat is toch waal erg te betreure. Want vandaag waore d’r supporters van beide plouge die waal get te mekkere houw op ‘m, maar de gemiddelde sjeids houw vandaag vief kaarten aan beide plouge oetgedeild. Meijers heel de kaarten op zak en houw desondanks de wedsjtried prima onger controle.

Veur de wedsjtried pakte de helaas nog geblesseerde Randy eindelijk ens get op, wo hae al waeke zien gal euver sjpuwde: dat ziene brouer Wesly in ’t massage-hok nog ummer de elftalfoto van veurig sezoen houw ophange. Es doe die neit deis vervange, dan wirk ich ‘m zelf waal bie, aldus Wantelic. En dus pakte hae get sjtukskes zjwarte tape en ging aan ’t werk:

afb8

Op de vraog van de sjriever van dit sjtuk of Randy neit eine zjwarte sjtreep vergaete waor, antjwoordde dae tactisch: “Ich ben nogal gek. Geisse dalik waer get vervaelends euver mich sjrieve.”

De Sjter begoosj, zo wie ummer dit sezoen, euverweldigend aan de wedsjtried. Want al nao ’n paar minute kupte Davy taege de lat. De gael-zjwarte controleerden de wedsjtried maar kome toch op achtersjtandj. De schaduwsjpits van Sjarn maakte un actie vanaaf ozze linkerkantj nao binne, brach de bal bie Sjarn-topscorer Kroon en dae knalde de bal vanaaf de randj van de 16 binne veur de 0-1.

De Sjter waor effe aangesjlage maar domineerde al sjnel waer. En dat resulteerde in de 25e minuut in de terechte geliekmaker. Unne corner van Hassan waor lang ongerwaeg, maar woort bie de tweede paol prachtig binnegekup in de lange houk door Stan: 1-1.

De Sjter drukte noe door en ’n prima combinatie tusje Hassan, Thijs en Ricardo bood Ikram ’n sjeitkans. De keeper moosj zich gans sjtrekke maar koosj nog net redden. Vlak daonao nog ’n sjeitkans veur Stan die helaas euver ging.

Kort veur rus koom Sjarn nog unne keer geveerlijk door. ’T waor aan geweldig verdedigen van Steve te danke dat die kans woort verijdeld. In de letste minuut veur rus kreeg Davy nog un kupkans nao unne goeie veurzet van Thijs, maar auch dao koosj de keeper waer redden.

De eesjte helf waor leuk om te zeen en ’t leek wachten op de genadeklap van De Sjter in de tweede helft. Dat zou echter angesj loupe. De Sjter begoosj nog aardig maar koosj al sjnel geit potten meer braeke. Opnuuj ’t actie van de sjaduwsjpits van Sjarn leek aaf te loupe mit unne sjlechte sjeut. Dae woort echter nog van richting verangerd door wederom sjpits Kroon, wodoor De Sjter inens taege unne achtersjtandj aankeek. Coach Czornyj ging daonao risico numme en brach Marko Jevric (dae al 90 minute in de bein houw op 2) veur de geblesseerde Steve. De Sjter drukte Sjarn terugk zonger ooit dreigend te waere. Tot de 80e minuut. Toen pikte Hassan attent unne klutsbal op in de 16, passeerde ziene taegesjtenjer, knalde de bal langs de keeper taege de paol, wonao Marko de rebound attent binnetikte. Marko keek geliek mit unne grote glimlach richting Peter Peerlings, dae naeve de dug out sjting. Pas naodat de sjeidsrechter veur de letste keer houw gefloate, bleek de achtergrondj van dae glimlach:

Twee waeke geleje houw Marko nog ’t sjnoep-tuutje van ’t sjpelerke van de waek laeggegaete omdat dae ’t zelf neit houfde, omdat hae op maondig nao de tandjarts moosj. Vandaag houw Marko echter minder geluk, want sjpelerke van de waek Meike Frissen zei, volkomme terech “nae” wie Marko ’n snoepje vroog. Verontwaardigd beklaagde Marko zich dao op bie Peter Peerlings, dae Marko ’n sjnoeptuutje én ’n flesjke extran belaofde es Marko zou scoren vandaag. Klasse Peter! Dankzij dich is De Sjter vandaag ’n punt ingeloupe op koplouper LHC, dat verrassend verloor.

En euver sjpelerke van de waek Meike Frissen gesjproake… Ich eindig vandaag mit ’n fantastisch citaat van Meike, die naeve Randy Wanten op de bank zoot en die gesjrokke heurde dat Randy op enig moment zien frustraties uitte: “R*tte K*t sjengen! Wat ein sjtr*ntjvol is dat toch!” Wo op Meike heel rustig taege Randy zei: “Mijn papa komt ook uit Maastricht, is hij dan ook een kut sjeng?”

Rob Sjulpe

De Ster Nieuwsbrief - Blijf op de hoogte!

grote clubactie steundester banner links

rksv de ster walking football 2018 1x250

ster webshop links 250

activiteitenoverzicht

Geen evenementen

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.