Wedstrijdverslagen

Dees waek sjtarte veer ens neit bie ’t voetballe in ’t weekend, mer bie de nach van maondig op dinsdig. Waorom? Dat waor d’n eesjte daag dat alwaer input van ’n tweetal versjlaaggaevers binnekoom veur dit versjlaag. Opvallend waor dat beiden precies dezelfde informatie deilden: unne kanonne-zate Roel “Lexie” Heffels dae oet de Oktoberfeest-tent in Zittert waor komme waggele en zich maar effe houw neergelag:

afb1

Auch vanoet de veterane waor ’t aafvaardiging op de oktoberfeeste gewaes, wo onger coach Pep Fredrix. En dae leet gein kans veurbie gaon om foto’s te deile van zien echtgenote Corry op de groepsapp:

afb2

Ja en dan kense waal greutsj zeen op dien sjoon vrouw, maar esse zo’n foto op de groepsapp zets, dan kense wachte op de reacties:

afb3

En esse dan denks dat de oktoberfeeste gelukkig waer d’r op zitte en de gedachte waer richting voetballe kenne, krigse nog ’n foto naogesjik wo op ’n wirk-paerd van De Sjter 1 (Roel), ’n wirk-paerd van De Sjter 2 (Jari), ’n ras-paerd van De Sjter 3 (Raoul, in deins-tenue) en unne luipsje poema (De Keul in ’n onverklaorbare pose) poseren.

afb4

Goud, dan toch maar door nao ’t voetballe. Om te beginne mit de veterane. Die houwe unne lestige thoeswedsjtried op ’t programma doon zaoterdigaovend. Taegesjtenjer Sjummert hou namelijk aangegaeve dit kalenderjaor nog alles te hubbe gewonne. En dan moosjte de vets auch nog aantraeje zonger de oetblinkers van veurige waek, Roger d’n Doam en Will Leurs. Roger leek nog effe te suggerere dat hae toch ging mitdoon, wie hae op zaoterdigochtend de kantine in koom loupe.

Rob: “Enne, geisse dich al werm loupe?“

Roger: “Nae, ich hub veurige waek mien tesj laote sjtaon. Tenminste… ich hub ze of hie of bie Café de Put laote sjtaon.”

Rob: “Dat meinse neit.”

Roger: “Ja, ich hub ongerhauf jaor neit gevoetbald. Ich ben neit meer gewend dat ich ‘n voetbaltesj bie mich hub.“

Marian: “D’r sjteit achter in de gangk nog ’n tesj. Maar es ich geweite houw dat die van dich waor dan…”

Roger: “Dan houwse mien sjpulle gewesje, he. Dat wolse toch zegke, Marian, of neet? Doe bes ’n wereldvrouw!”

Ondanks ’t ontbraeke van meerdere sjterkhouwers, wonne de veteranen soeverein hunne pot taege Sjummert mit 4-1. Goaltjesdief Jacky Linders scoorde waer drie keer en nadert Stef Conjour in ’t topscorersklassement. In de goal sjitterde Peter Paes, dae ondanks zien 1,70m door Willem Thewissen sjteevas ‘de lange Paes’ wurd genuimp. En Peter deig ziene koosnaam eer aan door veur rus unne bal oet de krusing te plukke. Kritiek waor d’r auch op sommige sjpelers. Zo kreeg de sjriever van dit sjtuk ’t neudige commentaar te verwirke wie hae probeerde om unne bal subtiel mit vaol effect in de krusing te krulle, maar de bal net naeve de paol zoog eindige. Van de bank woort geroupe: “Rob, probeer doe noe eesj ens normaal op goal te sjeite, doe bes Will Leurs neit.

Maar de absolute oetblinker waor zaoterdig Robert Lucassen. Wie Robbie Rensenbrink in zien beste jaore, dribbelde os slangenmens keer op keer door de Sjummerter defensie. Robert beloonde zien baere-partie oeteindelijk mit ’n prachtige goal, unne krachtige kopsjtoot à la Ruud Gullit in de EK-finale van ’88.

Nao de wedsjtried woorte, onger ’t genot van menig juupke, waer de neudige anecdotes gedeild euver de goeie ouwe tied. En dat waor toch al de teneur van dit weekend. Want punte woorte d’r dit weekend neit vaol gehaold door de Sjteinder seniorenteams, maar d’r woorte waal waer heel get gezellige uurkes doorgebracht in de kantine.

De dames houwe vandaag waer gein programma. De Sjter 5 waal. “De beesten” moosjte op bezuik bie Sporting Sittard. Hoewel d’r waer vaol 100% kanse woorte gecreëerd (en gemis), woort d’r oeteindelijk aafgeteikend verlaore: 5-0. De einige sjpeler dae neit deilde in de malaise bie 5 waor Marco Vaassen, dae wederom foutloos bleef vandaag, volges reporter Mike Schippers. Bie wiejere naovraag bleek Marco vandaag echter in Hasselt te zitte bie ’t EK Darts.

De Sjter 4 moosj vandaag op bezuik bie Heidebloem 2. En veur sjpeler/coach Patrick Nordhausen zeen dat toch ummer speciale pötjes. Heidebloem is namelijk de ploug wo Patrick zien “glory days” es voetballer belaefde. De zoepnaze van 4 knokten zich thoes op ’t Hetjen nao ’n verdeind punt. Dat punt leek aanvankelijk nog wiet weg, wie de jaorige Roy Janssen besjloot om ’n cadeau weg te gaeve aan die van Heidebloem wodoor de gael-zjwarte mit 0-1 achter kome. Gelukkig waor ’t de absolute oetblinker Pascal Conjour dae de score waer geliek trok. Pascal, de man dae in ziene grote teen meer van god gekrege talent haet zitte dan de ganse selectie van De Sjter 1 biejein (maar dae op unne gemiddelde zondig veur ziene kop allein auch meer alcohol consumeert dan de ganse selectie van De Sjter 1 biejein), sjitterde vandaag 90 minute langk. En in de letste minuut houw hae zich auch nog onsjterfelijk kenne make wie hae allein op de keeper aaf koosj. Helaas ging dae poging net euver. Maar auch dat koosj absoluut gein aafbreuk doon aan ’n geweldige partie van Pascal.

Nao de wedsjtried bleve de mannen van 4 vanzelfsjpraekend waer gezellig lang hange in de kantine. En dao koosjte ze unne troostende sjouwer beije aan de jonges van De Sjter 2 dei terugk kome van hun busrit nao Uden.

Want ozze beloften moosjte vandaag al om hauf 9 aafreize nao Brabant veur ’n krachmaeting mit wederom ’n topploug oet de reserve hoofdklasse. Qua programma zit ’t ozze jonges auch neit ech mit deze competitie, want in de eesjte 8 wedsjtrieje haet men de complete top 6 al es taegesjtenjer gehad. Sjtuk veur sjtuk plouge die al jaore ’n vaste waarde zeen op ’t hoogste niveau, die besjikke euver sjterke selecties van 18 geliekwaardige sjpelers, die in sommige gevalle drie keer per waek traine en die mit 2 vingers in de naas mit zouwe kenne in de 2e klasse wo os 1e in sjpeelt. Vandaag bleek Udi auch ’n paar maote te groot en drukte dat auch oet in ‘n 6-0 score.

Nao aafloup in de bus natuurlijk gein oetgelaote sfeer. Maar zowel in de bus es later in de kantine woorte toch ’n paar juupkes gedronke op de verjaordaag van Luc Spaans, dae veur de gelaegenheid zelfs woort oetgedos mit ’n feestelijke huitje.

afb5

T teikent waal de teamspirit dat ’n groot deil van de selectie en sjtaf van 2 in de kantine nog oerelangk biejein bleef mit de mannen van 4. Haopelijk kenne ze dae team-geis de kommende drie waeke omzette in punte taege achtereinvolges Venray, NWC en Nulandia, drie plouge die op de ranglies nog binne sjootsbereik zeen.

De Sjter 3 coach Mark Habets wis vandaag neit wat ‘m euverkoom. Tot dit weekend houw hae jedere wedsjtried nog ’n beroep motte doon op jeugdsjpelers of veteranen om zien selectie te completeren. Vandaag bleek de ziekenboeg echter grotendeils laeg te zeen, wodoor 3 zelfs 16 (!) eige sjpelers besjikbaar te hubbe. Auch keeper Kai waor waer fit en houw zich zelfs ’n prachtig nuuj tenue aangesjaf. En Kai besjloot dat tenue maar geliek goud in te wieje, want nao de warming up meldde hae zich waer in ’t kleidlokaal mit pratsj tot achter de ore.

De nog altied puntloze godenzonen moosjte thoes aantraeje taege Lintjheuvel 2. ’T eesjte kwarteier ging ’t nog geliek op maar in de 10 minute daonao leep Lintjheuvel al oet nao 0-3. En bie rus waor ’t versjil zelfs opgeloupe nao 0-5. Wo menig coach in zo’n situatie compleet in paniek zien sjpelers sjtief zou sjeije en mit tesje zou beginne te sjmiete in ’t kleidlokaal, dao bewaarde coach Habets de rus. Op de veur heum zo kenmerkende wieze wis Mark precies de goei sjnaor bie zien mannen te rake. En dat houw effect, want in de tweede helft bleve beide plouge prima in evenwicht. Doelpunten van Mathon van de Woude en Marco Verhoeven en nog 2 goals van Lintjheuvel, brachte de eindsjtandj op 2-7.

Of de wedsjtried vandaag nog memorabele quotes houw opgeleverd, vroog de sjriever van dit sjtuk aan coach Habets. Dae reageerde es volgt:

afb6

Volgende waek is ‘t “Do or Die” veur De Sjter 3, want dan sjteit de derby der derby’s taege Haslou 3 op ’t programma. “Taege die van Aelse hubbe veer de letste 2 sezoene neit verlore en die reeks gaon veer zonjig oetboewe”, aldus coach Habets vol vertroewe.

Dan door nao ’t hoofdgerecht van vandaag. De Sjter 1 moosj onger ’n prettig zunke op bezuik bie laagvlieger Adveo. Coach Czornyj moosj mit ’n kleine selectie aafreizen, aangezeen letste wisselsjpeler Marko Jevric nog vanoet Uden nao Oosjbaek gereje moosj waere, nao de wedsjtried van 2. Die taak woort door Ans Vankan op zich gepak (woveur hulde, Ans!) en dat leverde nog ’n sjoon verhaol van Marko op. Dae vertelde op de bank in Oosjbaek “op z’n Marko’s”:

Die Ans kan echt racen. Volgens mij reed ze wel 200 km per uur toen er ineens een doif op het wegdek verscheen. Die doif probeerde nog op te stijgen, maar werd door Ans vol geschept. Die zelfmoord-doif knalde keihard tegen de raam. Echt een knal, jongen. Echt zo van DOEFFFF!”

De wedsjtried begoosj prima veur de gael-zjwarte want nao 10 minute waor dao al de veursjprong via Guido dae mit unne magistrale volley de 0-1 aanteikende. Ech ’n wereld-doelpunt!

Vlak nao die goal raakte auch nog ens de keeper van Adveo geblesseerd en moosj zich laote vervange. Kat in ’t bakkie, leek ’t dus vanaaf de ziekantj. En euver dae ziekantj gesjpraoke.. dao deig zich nog get apaarts veur. Want coach Czornyj sjting nao ’n minuut of 20 ‘al coachend’ inens 25 maeter van de eige dug out aaf. Wat bleek: zonger omliening van ‘t coach-vak veur de dug out waor Ronny zien richting gevuil effe kwiet.

In de 35e minuut koom Adveo vanoet ’t niks op gelieke hoogte. Unne bal woort door ’t centrum van de verdediging gesjtaoke, wonao de sjpits van Adveo soeverein aafronjde: 1-1. Vlak veur rus raakte Ikram nog de lat, wodoor de 1-1 auch de rustsjtandj bleek.

De tweede helft waor ’t voetballe neit geweldig. De Sjter controleerde de wedsjtried, maar sjpeelde slordig wodoor ’t aantal kansen beperkt bleef. In de 70e minuut waor d’r inens opsjudding rondjom Roel Heffels. “Op dat moment woort Roel unne échte man”, zou Randy later verklaore. Roel trapte heel lichtjes nao, wo op ziene taegesjtenjer waal erg vaol verdreit houw. De sjeids trok de rooie kaart, wo gael meer op zien plaatsj waor gewaes.

Ondanks de numerieke minderheid waor ’t toch De Sjter dat de geveerlijkste ploug bleef en zelfs nog kansen kreeg om te scoren. Die kansen woorte helaas neit verzilverd en dus moosj oeteindelijk genoege genomme waere mit 1 punt. En dat vuilde toch waal aan es ’n nederlaag. Toch woort om de verlore punte neit lang getreurd. Want terugk in Sjtein koom vreselijk nuujts door van de vandaag aafwezige Barney. Zien mam, Rosita, is vanmiddig vaol en vaol te jongk euverleje. Rosita, die auch tiedes heur ziekte zoveul muigelijk wedsjtrieje van De Sjter 1 mitpikte en dan altied, zittend in de serre, veur jederein ’n vrunjtelijk woord euver houw, zal versjrikkelijk gemis waere. Barney, Carmen, Celine en Hub, names de hele Sjter-femieje heel vaol sjterkte gewunsj.

Rob Sjulpe

De Ster Nieuwsbrief - Blijf op de hoogte!

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.