Wedstrijdverslagen

T is nog maar begin November maar ozze jonges van de Mini F koosjten vanmurge om kwart op 8 op de parkeerplaatsj van ’t Hetjen al de herfsttitel ruuke. Op ’t programma sjtinge wedsjtreidjes taege de einige angere ongesjlage ploug oet ozze competitie, DVO. Ozze jonges houwe d’r allemaol vaol zin.

Aangekomme bie DVO woorte de jonges ingedeild in twee teamkes. ’T team van trainer Ron besjting oet Kyano, Axel, Lucas, Joep en Bart. En ’t team van trainers Barry en Rob besjting oet Sjoerd, River, Luuk, Niels en Chanon. Veur de wedsjtreidjes houwe ozze jonges d’r allemaol supervaol zin in omdat de trainers houwe gezag dat DVO auch alles houw gewonne. “Dus als we winnen zijn we kampioen van gemeente Stein, jongens”, zei Lucas. Dao op woort d’r flink gejuicht en sjprintten de teamkes nao hun veldjes.

T team van Kyano, Axel, Lucas, Joep en Bart sjpeelde unne supersjpannende wedsjtreid taege ’t sjterkste teamke van DVO. Op ’t kunstgraas ging de bal sjnel oet en dat waor effe wenne veur ozze jonges. Maar wie ze dat eenmaal in de gate houwe, volgde de eine aanval nao de angere. Mit leuk voetbal, sjieke trucjes, mooie sjprints en leuk samensjpel woort DVO terugkgedronge. Maar helaas eindigden alle sjoten van ozze jonges op de paol. Maar leifs veier keer woort de paol geraak (wovan eine keer op os eige goal..). De wedsjtreid woort aafgesjlaote zonger goale, veur ’t eesj dit sezoen.

Op ’t angere veldj houwe Sjoerd, River, Luuk, Niels en Chanon ‘t ’n sjtuk mekkelijker taege ’n minder sjterk team van DVO. De wedsjtreid begoosj mit waal erg vaol euversjpele. Leuk dat de jonges dat zelf oppakken, maar trainer Rob reep Sjoerd en Niels bie zich en zei dat ’t sjiek waor dat ze euversjpeelden maar dat ze bes zelf mit de bal mochte renne en taegesjtenjers oetsjpele. Dat lete ze zich gein twee keer zegke, want al sjnel maakte Niels de 1-0 nao unne sjone solo langs drie taegesjtenjers. Kort daonao veel auch de 2-0. Die goal woort gemaak door River, dae waer vaol sjieke trucjes leet zeen vandaag en dae auch al vaol mit zien zjwakere rechterbein deit. Klasse River! Gisteraovend houw trainer Rob nog taege River’s pap gezag: “River kent waal al vaol trucjes. Sommige ken ich zelf neit ens oetveure. Hubse ‘m sjiek geleerd.” Wo op papa Mark zei: “Ich dach das doe ‘m die geleerd houws, want ich ken ze zelf auch neit veurdaon.”

De wedsjtreid ging door en ozze jonges sjpeelden lekker fel wodoor DVO geine eine keer euver de middellien koom. Auch Luuk ‘buttelde’ lekker en ziene knal ging maar net naeve de goal. De 3-0 koom d’r oeteindelijk toch via opnuuj Niels. Neit vaol later waor ’t Chanon dae de turbo aanzat, unne sjouwerduuj oetdeilde en daonao de bal binnesjoot veur 4-0. En dat toverde unne supergrote glimlach op Chanon’s gezich en hae rende juichend en sjpringend terugk nao de eige helft. ’T sjlotakkoord waor veur Sjoerd dae mit zien chocoladebein de 5-0 eindsjtandj aanteikende. Klasse Sjoerd!

Nao de dikverdeinde ranja woort d’r van helft gewisseld. ’T team dat de eesjte wedsjtreid houw gewonne, kreeg noe de sjterkste taegesjtenjer. En dat waor auch waal te mirke. Ozze jonges moosjten flink hun bes doon om kenskes oet te sjpele. En daobie is bie de tweede wedsjtreid de aandacht natuurlijk neit ummer meer d’r bie. River houw ’t druk mit blaedjes oprape en in sjtukke sjeure, Luuk telde ’n paar keer hel op wievaol sjpelers d’r op ’t veldj sjtinge en ’n leeg euvervleigend vleigtuug trok auch ’n paar minuten de aandacht van alle 10 kenjer.

D’r waore maar weinig kansen om te scoren totdat Sjoerd de letste taegesjtenjer oetsjpeelde en nao de laeg goal rende. Maar helaas woort hae vakkundig (mit twee henj in de rugk) door unne taegesjtenjer omgeduujd veurdat hae koosj sjeite. Wie de traone waore opgedreug noom River de vrieje trap en knalde dem per ongeluk keihel in de boek van unne DVO sjpeler en dus koosjte d’r waer traonkes waere gedreug. Oeteindelijk bleef ’t ondanks de neit aaflaotende inzet van kilomaetervraeters Sjoerd en Niels bie 0-0.

Op ’t angere veldj trof os teamke de zjwakere ploug van DVO. Desondanks koom DVO nog op unne 1-0 veursjprong. De sjtandj woort al sjnel door Bart terugkgebrach nao 1-1. En toen trok auch op dit veldj ’t leeg euvervleigende vleigtuug de aandacht van 9 kenjer. De einige twee op ’t veldj die neit nao ’t vleigtuug keke waore Lucas en de sjeidsrechter en Lucas koosj dan auch ongemirk de 2-1 veursjprong binne sjeite. Lucas leep juichend weg en 9 anger kenjer keke ‘m vraogend aan: “Wat is d’r gebeurd?”

Oeteindelijk lepe ozze jonges oet nao ‘n 7-1 euverwinning, mede door unne onvervalsjte hattrick van Bart.

Wie alle oetsjlage bei ein opgeteld woorte, heurden de jonges dat d’r vandaag mit 12-1 gewonne waor en dat leidde tot flink gejuich. “Waar is onze kampioensbeker?”, vroog Lucas. Tot zien teleursjtelling heurde hae dat d’r toch ech nog 2 wedsjtreidjes gesjpeeld moosjte waere de kommende waeke. Maar de titel van “herbstmeister” kent ozze Mini F eigenlijk neit meer ontgaon.

Leuk veur de kenjer, maar ’t allerleukste veur trainers en ouwesj is dat alle kenjer eigenlijk ummer mit plezeier komme voetballe, vaol lol hubbe ongerein en zich goud versjtaon en de meesten auch thoes en op sjool ’t leefs de ganse daag voetballe. Letste woord vandaag is aan River Habets dae nao de wedsjtreid zei: “Trainer, witse wat miene pap zaet es ’t geit poepen?” Wie de trainer “nae” sjudde mit de kop, vulde River aan: “Dan zaet ‘r: ich gaon effe faxen!” Wo op ’t ganse team in ’n deuk loog.

De trainers, Barry, Ron en Rob

De Ster Nieuwsbrief - Blijf op de hoogte!

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.