Wedstrijdverslagen

Deze zaoterdig sjting veur de Mini F van De Sjter de derby taege Haslou op ’t programma. Reje veur trainers Barry, Ron en Rob om aafgeloupe gounsdig nog ens get extra trucjes te lere aan ozze jonges, zodat die op zaoterdig geshowed koosjte waere. Nao de training bleve alle kenjer nog effe in ’n kringske op ’t veldj zitte en zei trainer Rob mit vaol gevuil veur drama: “Jonges, zaoterdig sjpele veer de belangriekste wedsjtried van ’t sezoen. En wae kent mich vertelle waorom?”

MF De Ster
’T gehaopte antjwoord (“veer sjpele taege Haslou!”) van de kenjer bleef oet, maar d’r volgden waal enkele leuke pogingen van diverse kenjer:
Sjoerd: “Omdat ’t kinderboekenweek is?”
Niels: “Omdat de herfst begoosj is?”
Sam: “Zaoterdig? Dan mot ich zjwumme trainer. Dan ken ich neit voetballe.”
Chanon: “Omdat het dan dierendag is?”
Joep: “Omdat ’t oktober is?”
Bram: “Motte veer zaoterdig voetballe????”
Nae ’t derby-gevuil laef (gelukkig) nog neit ech bie de kenjer. Althans, dat versjilt auch per kindj. Zo venjt Sjoerd ’t ummer extra leuk om taege Haslou te sjpele omdat papa Barry dao voetbalt. En Kyano zei vanmurge bie ’t ontbijt taege papa Ron: “Taege Haslou vandaag, pap. Die zeen ech sjlech. Haslou kent ech neit goud voetballe.” Wo op Ron houw gezag: “Nou Kyano, wie pap zo oud waor es dich, sjpeelde hae auch bie Haslou.” ’N reactie wo Kyano sjnel mit vaerdig waor: “Dan waors doe vruiger dus auch ech unne sjlechte voetballer!”
Maar goud, op zaoterdigmurge om hauf 10 verzamelden de 10 sjpelerkes van ozze Mini F zich veur de wedsjtried taege Haslou. En om 2 minute op hauf 10 sjting jederein al op de wei te trappele van ongeduldj om te beginne. De trainers sjmete ’n paar bel ’t veldj op zodat de jonges effe lekker koosjte oetrazen. Om 5 veur 10 waor ’t kunstgraas vrie en koosjte de Mini F veldjes waere oetgezat. Taegesjtenjer Haslou houw 9 sjpelerkes en veer 10. D’r woorte 2 teamkes geformeerd. Trainers Ron en Barry mochte aan de sjlaag mit Kyano, Chanon, Seth, Sjoerd en Niels. Trainer Rob’s team besjting oet Lucas, Joep, Bart, Axel en River. Bie os dus allemaol 2e jaors sjpelerkes, op Axel nao. Bie taegesjtenjer Haslou allein maar 1e jaors sjpelerkes.
Euver de wedsjtrieje dit keer gein oetgebreid versjlaag. Doordat ozze jonges gemiddeld ’n jaor ouwer waore, waor ’t krachsversjil waer groot. D’r woort waal waer leuk gevoetbald vandaag. Geregeld woort goud euvergesjpeeld, of waore d’r leuke passeer-acties en sjoon goale te zeen. Hoogtepuntje waor toch Bart dae in de wedsjtried ’t trucje leet zeen wo aafgeloupe gounsdig nog oetgebreid op waor geoefend: net doon esof se sjuts en es de taegesjtenjer zich van sjrik omdreijt, sjnel d’r langs dribbele. Nou ja, Bart deig ’t veur de helf goud, want hae deig net esof hae ging sjeite, de taegesjtenjer dreijde zich om en Bart loog in ’n deuk van ’t lache, wonao ziene taegesjtenjer esnog de bal aafpakte. Waal klasse dasse ’t trucje deigs, Bart!
De veier klinkende euverwinningen vandaag houwe de volgende eind oetsjlage: 5-0, 7-1, 8-0 en 9-2. En ’t leuke waor dat vandaag jederein ’n goal haet gemaak: Seth, Niels en Lucas allemaol 1 goal, Chanon 2 goale, Axel en Bart 3 goale, Sjoerd 4 goale, Joep 5 goale en de absolute topscorer vandaag waor Kyano mit 8 goale! Veur Seth waor ’t trouwes zien eesjte goal in ’n competitiewedsjtriedje. Klasse Seth!!!!
Opnuuj heel goud gevoetbald jonges. Klasse!
Mede names Barry en Ron,
Rob Sjulpe

En mit dank aan Richard Eussen hie onger nog get leuke actie-foto’s:
2

3

4

5

hallenmasters left banner

rksv de ster walking football 2018 1x250

ster webshop links 250

De Ster Nieuwsbrief - Blijf op de hoogte!

Deze website maakt gebruik van cookies om voorkeursinstellingen bij te houden en analytische cookies om de website te optimaliseren.