Wedstrijdverslagen

Ozze Mini F begoosj aan ’t sezoen mit 14 sjpelerkes, maar inmiddels is de groep al oetgegruijd tot 23 sjpelers! Vandaag sjting d’r veur alle kenjer ’n activiteit op ’t programma. D’r waore ’n aantal aafmeldingen in verbandj mit zjwumlesse en scouting-kamp, maar vanochtend sjtinge toch nog ummer 17 kenjer te trappele van ongeduld om te maoge voetballe.

De Ster mini F

Ein gedeilte moch al om kwart veur 9 verzamele op de parkeerplaatsj van De Sjter om aaf te reizen nao Berg aan de Maas veur de tweede competitiewedsjtried, dit keer dus taege IVS. Nao de klinkende euverwinninge van veurige waek taege FC Ria (9-1; 9-2; 5-1 en 5-0) loog ’t gevaor van ongersjatting natuurlijk op de loer. Taak dus veur de trainers Ron, Barry en Rob om ozze jonges op sjerp te kriege (veur de luuj die ’t trouwes nog neit in de gate houwe: dit versjlaag neit al te serieus numme esteblijf).

Aangekomme in Berg woorte sjnel de wedsjtriedshirts aangetrokke en sjtormden de gael-zjwarte jonges ’t veldj op om al lekker get te gaon sjtampe taege de mitgenomme belkes. Taegesjtenjer IVS bleek 7 sjpelerkes te hubbe en veer houwe d’r 9, dus jeder teamke houw eine wissel. De teams woorte ingedeild. Ron’s team besjting oet Kyano, Bart, River, Chanon en Joep. ’T team van Barry en Rob besjting oet Sjoerd, Lucas, Luuk en Niels. Barry en Rob vroge wae vandaag wol beginne es wissel. Domme vraog natuurlijk, trainers. Denk geer noe ech dat emes dan de vinger opsjtik? En nae, auch neit es geer d’r aan toevoeg dat toch jederein aeve lang maog voetballe. Dus moosj d’r maar iene-miene-mutte gedaon waere en koosjte de wedsjtriedjes beginne. De sjpelers van beide teams pakten de lat vas, de bal woort in ’t midden gelag en wie de sjeidsrechter floot waor ’t “RENNUHHHH!!!”

De Ster mini F

’T team van River, Bart, Chanon, Kyano en Joep begoosj taege ’t sjterkste teamke van IVS. Daobie mot euveriges gezag waere dat alle sjpelerkes van IVS oet 2009 waore en bie os allein Luuk oet 2009 is en de res oet 2008. De wedsjtried waor erg sjpannend. De score woort geaopend door Kyano, dae dezelfde sjtijl haet es pap: ’t zuut d’r neit ummer aeve fraai oet maar hae rijg de doelpunten waal aanein. Grote versjil tusje papa en zoon Frijters: Kyano haet in ’n dik jaor mini F noe al meer slidings gemaak dan pap in zien ganse illustere 35-jaorige carrière.
IVS koom echter terugk in de wedsjtried, wonao ‘t ’n goeie 5 minute geliek opging. Van de kantj van De Sjter waor veural ’t euversjpele leuk om te zeen. Maar natuurlijk waor ’t auch geregeld geneite van individuele hoogstandjes. Dat goeie sjpel leverde de 2-1 op van Chanon, dae wie unne echte goaltjesdief waer op de goei plaatsj sjting. Beperktere trainers zouwe Chanon aansjporen om mit terugk te verdedige. Maar trainer Ron wit es geine angere dasse ’t wiet kens sjuppe mit veurin belkes aafwachte. En dat leverde dus auch de veursjprong op. Klasse Chanon!
Daonao waor d’r gein haute meer aan. River heel achterin alles taege en vonj keer op keer zien medesjpelers. En veurin zurgden Bart, nogmaals Chanon en Joep d’r veur dat de score opleep nao 5-1. De eesjte euverwinning waor dus op zak. En dat goals gevierd motte waere, lete River, Joep en Bart zeen:
MF34-27914-3
Op ’t anger veldje waor d’r gein sjpraoke van unne eerlijke wedsjtried. Sjoerd, Lucas, Niels en Luuk walsten euver hunne taegesjtenjer haer. Nao de 2-0 sjproke trainers Barry en Rob al mit hun jonges aaf dat d’r allein maar gescoord moch waere naodat d’r eesj ’n paar keer euvergesjpeeld waor. Dat euversjpele woort auch geregeld netjes oetgeveurd en auch waore d’r leuke individuele hoogstandjes te zeen. Oeteindelijk koom jederein aan scoren toe en eindigde de wedsjtried door doelpunten van Luuk (1x), Sjoerd (2x), Lucas (3x) en Niels (6x) in ‘n 12-1 euverwinning (in 15 minute; dus wae goale wult zeen mot ens nao de Mini F komme kieke). Veur Luuk waor ’t trouwes geliek zien eesjte goal in zien eesjte competitie-wedsjtriedje.

MF34-27914-4

Nao de ranja wisselden de teams van IVS van veldj. Aan de krachsverhoudingen verangerde echter weinig. ’T team van Kyano, River, Joep, Bart en Chanon waor auch noe te sjterk veur de taegesjtenjer. Op enig moment besjloot trainer Ron zelfs maar mit 3 sjpelers taege 4 van IVS te gaon sjpele, maar auch dit brach gein oetkomst. Via doelpunten van Kyano (3x), Joep (3x), Bart (1x) en Chanon (1x) woort de oetsjlaag op 8-0 bepaald. Allein River houw bie dit teamke dus neit gescoord vandaag, maar dat is typisch River. Es ’t te mekkelijk geit, zurg hae dat ’t achterin toe blif en vuilt hae weinig drang om zelf te score. Bovedien: opa waor neit komme kieke, dus esse toch geine euro per goal krigs, wat haet scoren dan veur zin? Maar es veer binnekort ens taege unne geliekwaardige taegesjtenjer sjpele, zal River jus waer in aanvallend opzicht sjittere.

De Ster mini F
’T team van Sjoerd, Luuk, Niels en Lucas houw de tweede wedsjtried meer taegesjtandj. Maar Niels zat De Sjter al sjnel via ’n bekeke schot op veursjprong. Via sjieke acties en combinaties woort daonao geprobeerd om de score oet te breiden. Niels rende zich de longe oet zien lief om in zien eentje taege 3 man te verdedige, maar veroverde toch vaak de bal en koosj dan passes versjture nao Sjoerd en Luuk. Helaas lukte ’t effe neit om meer goale te make. Oeteindelijk waor ’t waer Niels dae de 2-0 maakte en daonao effe moch oetruste langs de kantj. Lucas tilde de score vervolges nao 3-0 en (nao ’n taegegoal van IVS) nao 4-1. Dat waor auch de eindsjtandj.

MF34-27914-6

Naodat vervolges auch de penalty’s genomme waore, koosj d’r lekker gedoucht waere. ’T versjil waor get groot mit de taegesjtenjer, mede doordat ozze jonges gemiddeld ’n jaor ouwer waore. Maar goud, veurig jaor houwe veer waekelijks te kampen mit ouwere taegesjtenjers. Niks aan te doon dus. En leuk om te zeen dat de kenjer taege unne ‘mindere’ taegesjtenjer auch meer dinger gaon oetprobere, zo wie dribbele, trucjes en euversjpele. In 4x 15 minute voetballe is d’r nauwelijks eine keer unne bal geweun weggesjote. Klasse jonges!

Terugk gekomme op ’t Hetjen, waore de resterende 8 kenjer van de Mini F al bezig aan hun ongerlinge partiekes. Onger leiding van Ivo en Rob T. woort d’r mit zichtbaar vaol sjpas geoefend. Jesse, Tren, Levi S., Levi H., Ian, Loek, Kyano D. en Seth maakten d’r leuke partiekes van. Of, zo wie Willem Thewissen (papa van Ian), langs de kantj zei taege de inmiddels gearriveerde sjriever van dit versjlaag: “hoofdtrainer, de concurrentie bie de Mini F is moordend. De jonges die vandaag boete de basis veur de wedsjtried taege IVS zeen gevalle, traine vliem-sjerp.”
’T Waor ’n genot om te zeen wie deze grotendeils pas net gesjtartte talentjes sjpas houwe in ’t voetballe. En omdat plaetjes vaak meer zegke dan doezend weurd, hie onger nog get foto’s:

MF34-27914-7

MF34-27914-8

MF34-27914-9

MF34-27914-10

MF34-27914-11

Jonges, allemaol bedank dat veer es trainers en ouwesj waer unne ochtend hubbe maoge geneite van wievaol plezeier dat geer in ’t voetbal sjpelke hub. Klasse gewirk!
Mede names trainers Ron, Barry, Ivo, Marco, Peter en Rob T.,
Rob Sjulpe

De Ster Nieuwsbrief - Blijf op de hoogte!

Wij maken op deze website gebruik van cookies. Dit is een klein tekstbestandje dat met deze website wordt meegestuurd en door uw browser op de harde schrijf van uw computer wordt opgeslagen.
Met deze techniek kunnen wij bezoekersstatistieken bijhouden om de website te optimaliseren. Via uw browser kunt u het gebruik van cookies uitschakelen.