Wedstrijdverslagen

Op zaoterdigochtend sjting veur zowel de F3 es de F4 de tweede wedsjtried van ’t sezoen op ’t programma. Veurige waek houwe beide teams nog geoefend in en taege Haslou. De F3 houw dao, ondanks goals van Niels en River, mit 3-2 verlaore van Haslou F3. Maar de F4 houw dao glorieus de derby gewonne mit 9-0 van Haslou F6.

Nog ’n waek eerder houw de F3 auch nog mitgedaon aan ’t Urmondia toernooi en houw dao de 5e plaatsj behaold. Wie de kinjer zich nao ’t toernooi gedouche houwe deig zich dao nog get leuks veur in ’t kleidlokaal, wie trainer Rob de jonges vertelde wae de baeker moch gaon haole.

mf150919 1

Rob: “Jonges, vandaag maog de baeker gehaold waere door de sjpeler dae vandaag ’t beste gevoetbald haet van uch allemaol.”

Wie vervolges jederein ziene eige naam genuimp houw, ging de trainer door.

Rob: “Vandaag maog Lucas de baeker haole.”

Lucas (ontwapenend eerlijk): “Ja, ik vind zelf al een hele tijd dat ik de beste speler van het team ben.”

Maar goud, terugk nao deze ochtend. De teams van de F3 en de F4 zouwe vandaag nog unne keer taegenein oefene, es letste veurbereiding op de competitie dae volgende waek van sjtart geit. En alle jonges en trainers houwe d’r vaol zin in.

Aan de kantj van de F4, onger leiding van Stan Ortmans en Peter Paes, unne leuke groep jong sjpelerkes: de ummer vrolijke en ijverige Bram, verdediger mit prima techniek Casper, knoterpot mit winnaarsmentaliteit Dylano, topkeepers in spé Tren en Mika, topscorer Axel, alles-kunner Jarno, begaafd technicus Dyon en sliding-weltmeister Ian.

En aan de kantj van de F3, onger leiding van Ron Frijters, Barry Beckers en Rob Schulpen, auch unne leuke groep sjpelerkes: trucjes-man Sjoerd, sjpijkerhelle verdediger Jur, topkeeper en topsjpits Chanon, bulldozer Joep, de man mit de sjoonste trap River, alles-kunner Lucas, pingeldoos en topscorer Niels en goaltjesdief én keeper Kyano. De F3 moosj ’t vandaag doon zonger topkeeper en “kanon van Sjtein” Bart, dae op trainingskamp waor bie opa en oma op de camping.

De wedsjtried woort gesjpeeld volges de Fair play regels, omdat beide teams auch in de competitie volges die regels gaon sjpele. Dat beteikent dus weinig aanwiezinge van de coaches, de ouwesj get meer op aafsjtandj, ’n get kleiner veldj en geine sjeidsrechter. En dat ging vandaag, zo wie eigenlijk ummer waer prima. Althans… tot ’t moment dat F3-keeper Chanon de bal opraapte veur unne achterbal maar Willem Thewissen (papa van F4-sjpeler Ian) begoosj te kwaeke: “CORNER!”… Mit es gevolg dat Chanon de bal braaf aafgoof veur de corner en Willem zich langs de kantj besjeurde.

De eesjte helf woort besjlaote mit unne 6-0 veursjprong veur de F3 door goals van Sjoerd (2x), Lucas (2x), River en Niels. En toch kent gerus gezag waere dat de F4 prima en fel verdedigde. En F4 keeper Tren leet auch nog ’n paar sjieke reddinge zeen. Aan de kantj van de F3 ’n dik compliment veur River, dae dees waek ’n paar keer flink euver de klote gekrege houw van de trainers dat hae baeter moosj mitdoon en feller moosj zeen. Maar vandaag sjpeelde River wie veer dat allemaol gaer zeen. Klasse River! Al leet de trainer ‘m in de rus nog effe sjrikke..

River: “Rob, vinjse dat ich vandaag 20 minute langk goud mien bes hub gedaon?”

Rob: “Nae, maar ’n minuut of 16 eerlijk gezag.”

River (teleurgesjteld): “Oh…”

Rob: “Want die anger 4 minute hubs doe reserve gesjtange.”

River (opgeluch): “Hey, normaal maak ich die grepkes.”

Nao de dik-verdeinde pauze mit ranja woort waer mit 0-0 begoosj. Dit ondanks luidruchtige protesten van Joep, dae zich d’r oeteindelijk toch maar bie neer lag mit de weurt: “Ja oke dan, maar in miene kop tel ich geweun door bie 6-0.”

De tweede helft ging goud geliek op. En ondanks goals veur de F3 van Chanon, River, Niels (2x) en Sjoerd, kreeg auch de F4 ’n paar kenskes. Wie de wedsjtried bienao aafgeloupe waor, reep trainer Rob langs de kantj: “Letste goal is gewonne!”

En daonao doerde ’t welgeteld 20 seconde toen de bal oeteindelijk veur de vuit van F4-sjpeler Axel (de jongste op ’t veldj vandaag) koom. Dae bedach zich gein seconde en knalde de bal hoog in ’t daak van de goal en bezurgde de F4 zo de euverwinning.

En zo eindigde de wedsjtried op de ideale maneier: mit 2 teams die allebei dolgelukkig waore omdat ze gewonne houwe. Dat kent neit baeter. En nao aafloup woort gebroederlijk nog effe geposeerd veur de foto.

mf150919 2

Jonges, ’t waor waer sjiek om te zeen dat geer zoveul sjpas houwt allemaol!

Names de trainers,
Rob Sjulpe

 

 

 

 

hallenmasters left banner

rksv de ster walking football 2018 1x250

ster webshop links 250

De Ster Nieuwsbrief - Blijf op de hoogte!

Deze website maakt gebruik van cookies om voorkeursinstellingen bij te houden en analytische cookies om de website te optimaliseren.